‘രഞ്ജന്‍ ഗൊഗോയിക്ക് എതിരായ പീഡനക്കേസ് ഗൂഢാലോചനയാകാം’; തുടരന്വേഷണത്തിന് സാധ്യതയില്ലെന്ന് സുപ്രിംകോടതി സമിതി

സുപ്രിംകോടതി മുന്‍ ചീഫ് ജസ്റ്റിസ് രഞ്ജന്‍ ഗൊഗോയി ഉള്‍പ്പെട്ട ലൈംഗിക അതിക്രമക്കേസിന് പിന്നില്‍ ഗൂഢാലോചനയാകാമെന്ന് സുപ്രിംകോടതി സമിതി. ഗൂഢോലോചന തള്ളിക്കളയാനാകാത്തതിനാല്‍ കേസില്‍ തുടരന്വേഷണത്തിന് സാധ്യതയില്ലെന്നും സമിതി വ്യക്തമാക്കി. പരാതി രണ്ട് വര്‍ഷം മുന്‍പുള്ളതാണെന്നും തുടരന്വേഷണ സാധ്യത ഇല്ലാത്തതിനാല്‍ കേസ് അവസാനിപ്പിക്കുന്നുവെന്നും സുപ്രിംകോടതി അറിയിച്ചു. ജസ്റ്റിസ് എകെ പട്നായിക് സമര്‍പ്പിച്ച റിപ്പോര്‍ട്ടിലാണ് ഇക്കാര്യങ്ങളുള്ളത്.
ജുഡീഷ്യറി തലത്തിലും ഭരണതലത്തിലും ഗൊഗോയി എടുത്ത കര്‍ശന നിലപാടുകളാകാം ഗൂഢാലോചനയ്ക്ക് പിന്നിലെന്നും റിപ്പോര്‍ട്ടില്‍ പരാമര്‍ശമുണ്ട്. അസം എന്‍ആര്‍സി കേസില്‍ ഗൊഗോയി സ്വീകരിച്ച നിലപാട് ഗൂഢാലോചനയ്ക്കുള്ള ശക്തമായ കാരണമായിരിക്കാം എന്ന് ഇന്റലിജന്‍സ് ബ്യൂറോ റിപ്പോര്‍ട്ട് നല്‍കിയെന്ന് സുപ്രിംകോടതി അറിയിച്ചു.
ലൈംഗികാരോപണ പരാതി ജസ്റ്റിസ് എസ്എ ബോബ്ഡെ അധ്യക്ഷനായ സമിതി അന്വേഷിച്ച ശേഷം ഗൊഗോയിക്ക് ക്ലീന്‍ ചിറ്റ് നല്‍കിയത് കൂടി ചൂണ്ടിക്കാണിച്ചുകൊണ്ടാണ് സുപ്രിംകോടതി കേസ് അവസാനിച്ചതായി അറിയിച്ചത്. രണ്ട് വര്‍ഷം കഴിഞ്ഞതിനാല്‍ ഈ ഗൂഢാലോചനയുമായി ബന്ധപ്പെട്ട ഡിജിറ്റല്‍ തെളിവുകള്‍ നേടാനുള്ള സാധ്യതയും വളരെ കുറവാണെന്ന് കോടതി നിരീക്ഷിച്ചു.
2018ലാണ് മുന്‍പ് കോടതി ജീവനക്കാരിയായ ഒ രു യുവതി രഞ്ജന്‍ ഗൊഗോയിക്കെതിരെ പീഢന പരാതി നല്‍കിയത്. ഈ പരാതി ജസ്റ്റിസ് എസ്എ ബോബ്ഡെ അധ്യക്ഷനായ ബെഞ്ച് പിന്നീട് തള്ളുകയും ഗൊഗോയിക്ക് ക്ലീന്‍ ചിറ്റ് നല്‍കുകയുമായിരുന്നു.