മലിനമായ മാനസികാവസ്ഥയിൽ ചിത്രീകരിച്ചത്: ദീപികയുടെ വസ്ത്രത്തിനെതിരെ മധ്യപ്രദേശ് ആഭ്യന്തര മന്ത്രി

ഭോപാൽ∙ ബോളിവുഡ് ചിത്രം ‘പത്താനി’ലെ ഗാനത്തിൽ നടി ദീപിക പദുക്കോണിന്റെ വസ്ത്രധാരണത്തിൽ പ്രതിഷേധം രേഖപ്പെടുത്തി മധ്യപ്രദേശ് ആഭ്യന്തര മന്ത്രി നരോത്തം മിശ്ര. ചില രംഗങ്ങൾ ‘തിരുത്തിയില്ലെങ്കിൽ’ ചിത്രം പ്രദർശിപ്പിക്കുന്നത് സംബന്ധിച്ച് സർക്കാർ ആലോചിക്കുമെന്ന് അദ്ദേഹം പറഞ്ഞു. ഷാറുഖ് ഖാൻ നായകനാകുന്ന ചിത്രത്തിലെ ‘ബേഷ്റം രംഗ്’ എന്ന ഗാനം പുറത്തിറങ്ങിയതിനു പിന്നാലെയാണ് അദ്ദേഹത്തിന്റെ പ്രസ്താവന. ഗാനത്തിൽ ദീപികയുടെ വസ്ത്രധാരണം പ്രതിഷേധാർഹമാണെന്നും ഗാനം ചിത്രീകരിച്ചത് ‘മലിനമായ മാനസികാവസ്ഥ’യിൽ നിന്നാണെന്നും അദ്ദേഹം പറഞ്ഞു. “ചിത്രത്തിലെ രംഗങ്ങളും ഗാനത്തിലെ അവരുടെ വസ്ത്രങ്ങളും ശരിയാക്കാൻ അഭ്യർഥിക്കുന്നു. അല്ലാത്തപക്ഷം ഈ ചിത്രം മധ്യപ്രദേശിൽ അനുവദിക്കണോ വേണ്ടയോ എന്നത് ഒരു ചോദ്യമായിരിക്കും’’– അദ്ദേഹം മാധ്യമങ്ങളോട് പറഞ്ഞു. ആക്‌ഷൻ ത്രില്ലറായ ‘പത്താൻ’ ജനുവരി 25നാണ് റിലീസ് ചെയ്യുന്നത്.