മലയാളത്തിന്‍റെ ആമി പാര്‍വതിയിലൂടെ പുനര്‍ജ്ജനിക്കുമെന്ന് പുതിയ റിപ്പോര്‍ട്ട്‌

ബാംഗ്ലൂര്‍ ഡെയ്സ്, ചാര്‍ലി, എന്ന് നിന്‍റെ മൊയ്തീന്‍ എന്നീ സിനിമകളാണ് മലയാളിക്ക് പാര്‍വതി എന്ന നടിയോടുള്ള സ്നേഹം ഊട്ടിയുറപ്പിച്ചത്. ഇനി മലയാളത്തിന്‍റെ സ്വന്തം ആമി ആകാനൊരുങ്ങുകയാണ് പാര്‍വതി എന്നാണ് റിപ്പോര്‍ട്ടുകള്‍. മാധവിക്കുട്ടിയുടെ ജീവിതത്തെ ആധാരമാക്കി കമല്‍ സംവിധാനം ചെയ്യുന്ന ‘ആമി’ എന്ന ചിത്രത്തില്‍ ആമിയെ അവതരിപ്പിക്കാന്‍ പാര്‍വതി വരുമെന്നാണ് വിവരം. കമല്‍ ഇക്കാര്യം പാര്‍വതിയോട് സംസാരിച്ചുകഴിഞ്ഞു. പാര്‍വതി ഓകെ പറഞ്ഞു എന്നാണ് അറിയുന്നത്. വിദ്യാബാലന്‍ ചിത്രത്തില്‍ നിന്ന് പിന്‍‌മാറിയ ശേഷം ആമിയാകാന്‍ തബുവിനെ പരിഗണിക്കുന്നു എന്ന് വാര്‍ത്ത വന്നിരുന്നു. എന്നാല്‍ അത് ശരിയായ വാര്‍ത്തയല്ല എന്ന് കമല്‍ തന്നെ വ്യക്തമാക്കി. ഇപ്പോള്‍ ചര്‍ച്ചകള്‍ പുരോഗമിക്കുന്നത് ഈ പ്രൊജക്ടിലേക്ക് പാര്‍വതിയുടെ വരവ് സംബന്ധിച്ചാണ്.