പ്രതിഷേധം ഫലം കണ്ടു,കുഴപ്പക്കാരനായ ആനയെ പറമ്പിക്കുളത്തേക്ക് മാറ്റില്ല

മുത്തങ്ങയിലെ സ്ഥിരം പ്രശ്‌നക്കാരനായ ആനയെ പറമ്പിക്കുളത്തേക്കു മാറ്റുമെന്ന തീരുമാനം മാറ്റി.മുത്തങ്ങയിലെ ആനപ്പന്തിയില്‍ തന്നെ ആന തല്‍ക്കാലം തുടരും.പറമ്പിക്കുളത്തേക്ക് ആനയെ മാറ്റുന്നതിനെതിരെ നെന്മാറ എം എല്‍ എ കെ ബാബുവിന്റെ നേതൃത്വത്തില്‍ നാട്ടുകാര്‍ പ്രതിഷേധിച്ചതിനെ തുടര്‍ന്നാണ് അഡീഷണല്‍ ചീഫ് സെക്രട്ടറി പി മാരപാണ്ഡ്യന്‍ ഉത്തരവ് പിന്‍വലിച്ചത്.അധികാര പരിധി മറികടന്നാണ് മാരപാണ്ഡ്യന്‍ ഉത്തരവ് പുറപ്പെടുവിച്ചതെന്നും ആക്ഷേപമുണ്ട്.

ആനയെ മാറ്റുന്നതിനെതിരെ ആദിവാസികളുള്‍പ്പടെയുള്ളവരായിരുന്നു പ്രതിഷേധത്തിന് അണിചേര്‍ന്നത്.എം എല്‍ എ കെ ബാബു പറമ്പികുളത്തും സി പി ഐ -ഡി വൈ എഫ് ഐ പ്രവര്‍ത്തകര്‍ തൃശൂര്‍ പൊള്ളാച്ചി ദേശീയപാതയിലെ ഗോവിന്ദപുരത്തും കാമ്പ്രത്തുചള്ളയിലും പ്രതിഷേധിച്ചു.

വ്യാപകമായ തോതില്‍ കൃഷിനാശം വരുത്തിയ ആനയെ സുല്‍ത്താന്‍ ബത്തേരി കല്ലൂരില്‍ നിന്നും പറമ്പികുളം വനത്തിലെത്തിക്കാനുള്ള നീക്കമാണ് പ്രതിഷേധക്കാര്‍ തടഞ്ഞത്‌.വയനാട്ടില്‍ പ്രശ്‌നങ്ങളുണ്ടാക്കിയ ഒരു കാട്ടാനയെ കഴിഞ്ഞവര്‍ഷം പാലക്കാട് കല്ലടിക്കോട് വനപ്രദേശത്ത് എത്തിച്ചതും വിവാദമായിരുന്നു.

ആന പ്രദേശത്ത് അക്രമം തുടങ്ങിയതോടെ വനംവകുപ്പിന് നിയന്ത്രണം ഇല്ലാതായി. പിന്നീട് ആനയെ ഉള്‍ക്കാട്ടില്‍ ചെരിഞ്ഞനിലയില്‍ കണ്ടെത്തിയതോടെയാണ് പ്രദേശവാസികള്‍ക്ക് ആശ്വാസമായത്. പ്രദേശവാസികള്‍ കക്ഷി രാഷ്ട്രീയത്തിനതീതമായി സമര രംഗത്തിറങ്ങാന്‍ ഇതാണ് കാരണം.