ആസിഡ് കഴിച്ച് ജീവനൊടുക്കാന്‍ ശ്രമിച്ച യുവതികളില്‍ ഒരാള്‍ മരിച്ചു

ആസിഡ് കഴിച്ച് ജീവനൊടുക്കാന്‍ ശ്രമിച്ച് ചികിത്സയിലായിരുന്ന നെഹ്‌റു ഗ്രൂപ്പിന് കീഴിലെ പി.കെ ദാസ് മെഡിക്കല്‍ കോളജ് ജീവനക്കാരികളില്‍ ഒരാള്‍ മരിച്ചു. ഒറ്റപ്പാലം ലക്കിടി സ്വദേശി സൗമ്യയാണ് മരിച്ചത്. വാണിയങ്കുളം സ്വദേശി അശ്വതി തൃശ്ശൂര്‍ മെഡിക്കല്‍ കോളജ് ആശുപത്രിയില്‍ ചികിത്സയില്‍ തുടരുകയാണ്.

ഫെബ്രുവരി നാലിനാണ് സൗമ്യയേയും അശ്വതിയേയും ആസിഡ് ഉള്ളില്‍ച്ചെന്ന നിലയില്‍ ആശുപത്രിയില്‍ പ്രവേശിപ്പിച്ചത്. അതേസമയം, ഇരുവരും ജീവനൊടുക്കാന്‍ ശ്രമിച്ചത് എന്തിനെന്ന് ഇനിയും വ്യക്തമല്ല.

പി.കെ ദാസ് മെഡിക്കല്‍ കോളജിലെ റേഡിയോളജി വിഭാഗത്തില്‍പ്പെട്ട സൗമ്യയും അശ്വതിയും അടുത്ത സുഹൃത്തുക്കളായിരുന്നുവെന്നും ഇരുവരും ഈ ജോലി വിടാന്‍ തീരുമാനിച്ചിരുന്നുവെന്നും പിരിയേണ്ടി വരുന്നതിലുള്ള മനോവിഷമത്തെ തുടര്‍ന്നാണ് ഇവര്‍ ജീവനൊടുക്കാന്‍ ശ്രമിച്ചതെന്നും പറയപ്പെടുന്നു. എന്നാല്‍, ഇക്കാര്യത്തില്‍ സ്ഥിരീകരണമില്ല.