നഗ്നചിത്രം പകര്‍ത്തി പണം തട്ടുന്ന സംഘം അറസ്റ്റില്‍

ബിസിനസ്സില്‍ പങ്കാളിയാക്കാമെന്ന് പറഞ്ഞ് ഫോണ്‍ വഴി പരിചയപ്പെടുന്നവരെ മര്‍ദ്ധിച്ച് സ്ത്രീയോടൊപ്പം നിര്‍ത്തി ഫോട്ടോ എടുത്ത് പണം തട്ടുന്ന സംഘം അറസ്റ്റില്‍. ഏഴംഗ സംഘമാണ് പുരുഷന്മാരെ മര്‍ദ്ധിച്ച് വിവസ്ത്രരാക്കിയ ശേഷം ചിത്രമെടുത്ത് പണം തട്ടിയിരുന്നത്.

ചെറുകര സ്വദേശികളായ ഷമീര്‍, സുധീഷ്, അബ്ദുള്‍ വഹീദ്, മുഹമ്മദ് നൗഷാദ്, യാസിര്‍, മുഹമ്മദ് ഷബീബ്, റയ എന്നിവരെയാണ് പെരിന്തല്‍മണ്ണയില്‍ നിന്ന് അറസ്റ്റ് ചെയ്തത്. വടക്കാങ്ങര സ്വദേശിയായ യുവാവിനെ കോഴി ഫാമില്‍ പങ്കാളിയാക്കാമെന്നും ഫാം കാണിച്ചുതരാമെന്നും പറഞ്ഞ് ചെറുകരയിലെ സ്ഥലത്തു കൊണ്ടുപോയി മര്‍ദ്ധിച്ച് കാറും റാഡോ വാച്ചും കവര്‍ന്ന ശേഷം മുദ്രപ്പത്രത്തില്‍ ഒപ്പു വെപ്പിക്കുകയായിരുന്നു. പണം നല്‍കിയില്ലെങ്കില്‍ ആറു ലക്ഷം രൂപ തരണമെന്നും ഇല്ലെങ്കില്‍ ചിത്രങ്ങള്‍ പ്രചരിപ്പിക്കുമെന്നും ഭീഷണിപ്പെടുത്തി. യുവാവ് പരാതി നല്‍കിയതോടെയാണ് തട്ടിപ്പ് പരസ്യമായത്. ഇതോടെ പ്രതികളെ പോലീസ് കുടുക്കുകയായിരുന്നു.