ഭൂമാഫിയയുടെ ആളാരാണെന്ന് എല്ലാവര്‍ക്കും അറിയാം ; വിഎസിനെതിരെ എം.എം. മണി

മൂന്നാറിലെ ഭൂമി കയ്യേറ്റ വിഷയവുമായു ബന്ധപ്പെട്ട് വി.എസ്.അച്യുതാനന്ദനെതിരെ വീണ്ടും മന്ത്രി എം.എം. മണി. ആരാണ് ഭൂമാഫിയയുടെ ആളെന്ന് എല്ലാവർക്കുമറിയാവുന്ന കാര്യമാണ്. ടാറ്റ ഭൂമി കൈയേറിയെന്നു പറഞ്ഞ് സമരം നടത്തിയ വി എസ് ഇപ്പോൾ മിണ്ടാതിരിക്കുകയാണ്. പാർട്ടി വിലക്കുള്ളതിനാൽ കൂടുതൽ പറയാന്‍ താന്‍ തയ്യാറല്ലെന്നും മണി വ്യക്തമാക്കി.

വിഎസ് പറയുന്നതിനെല്ലാം മറുപടി പറയാതിരിക്കുന്നതാണ് അന്തസ്. ദേവികുളം എംഎല്‍എയായ എസ് രാജേന്ദ്രന്റെ ഭൂമിയുടെ കാര്യത്തില്‍ മുന്‍മുഖ്യമന്ത്രി ഉമ്മന്‍ചാണ്ടി കാണിച്ച മര്യാദപോലും വിഎസ് കാണിച്ചില്ല. വിഎസിന് വിശദീകരണം നൽകേണ്ട കാര്യം തനിക്കില്ല. ചില കാര്യങ്ങൾ കേൾക്കുമ്പോൾ പ്രതികരിക്കാതിരിക്കാൻ സാധിക്കുന്നില്ല. മൂന്നാറിൽ ഒരു തരത്തിലള്ള കയ്യേറ്റവുമില്ലെന്നും മണി പറഞ്ഞു.

മൂന്നാറിലെ സർക്കാർ ഭൂമി രാജേന്ദ്രൻ എംഎൽഎ ഉൾപ്പെടെയുള്ളവർ കയ്യേറിയതാണ് പുതിയ സംഭവങ്ങൾക്ക് കാരണമായത്. അതുമായി ബന്ധപ്പെട്ട് ഇന്നലെ വിഎസ് മണിക്കെതിരായി നടത്തിയ പരാമര്‍ശങ്ങള്‍ക്കാണ് ഇന്ന് അദ്ദേഹം മറുപടി നല്‍കിയിരിക്കുന്നത്. ആരാണ് കാര്യങ്ങള്‍ പഠിക്കാത്തതെന്ന് ജനങ്ങള്‍ക്കറിയാം. ഇതെല്ലാം ഭൂമാഫിയയെ സഹായിക്കാനാണെന്നുമായിരുന്നു വിഎസിന്റെ പരാമര്‍ശങ്ങള്‍.