മുഖ്യമന്ത്രിക്ക് കാനത്തിന്റെ പരസ്യ വിമര്‍ശനം

സമരം കൊണ്ടെന്തു നേടി എന്നു ചോദിച്ച മുഖ്യമന്ത്രി പിണറായി വിജയനെതിരെ പരസ്യ വിമര്‍ശനവുമായി സിപിഐ സംസ്ഥാന സെക്രട്ടറി കാനം രാജേന്ദ്രന്‍ രംഗത്ത്.ട്രേഡ് യൂണിയന്‍ സമരങ്ങള്‍ക്കെതിരെ പണ്ട് മുതലാളിമാര്‍ ചോദിച്ചിരുന്ന ചോദ്യമാണിത്.അതായിരുന്നു പാരമ്പര്യവും.

ജിഷ്ണു പ്രണോയിയുടെ അമ്മ മഹിജയും ബന്ധുക്കളും നടത്തിയ സമരം കൊണ്ട് എന്തു നേടി എന്ന മുഖ്യമന്ത്രിയുടെ പ്രതികരണം ശ്രദ്ധയില്‍പ്പെടുത്തിയപ്പോള്‍ കാനം പരിഹസിച്ചുതള്ളി. മുഖ്യമന്ത്രിയുടെ പൊലീസ് ഉപദേഷ്ടാവായി രമണ്‍ ശ്രീവാസ്തവയെ നിയമിച്ചപ്പോള്‍ ആദ്യം ഓര്‍മ വന്നതു കെ.കരുണാകരനെയും പാലക്കാട്ട് പൊലിസ് വെടിവയ്പില്‍ സിറാജുന്നിസയെയുമാണ്. മൂന്നാര്‍ പ്രശ്‌നത്തില്‍ മന്ത്രി എം.എം.മണിയെ നിയന്ത്രിക്കേണ്ടതു കാനം പറഞ്ഞു.

തന്നെ ആരാണ് ഉപദേശിക്കേണ്ടതെന്ന മിനിമം സ്വാതന്ത്ര്യമെങ്കിലും മുഖ്യമന്ത്രിക്ക് നല്‍കണം. നിരവധി ഉപദേശകരുണ്ടായിട്ടും അതിന് ഗുണം കാണുന്നില്ലല്ലോ എന്ന ചോദ്യത്തിന് കാത്തിരിക്കൂ എന്നായിരുന്നു മറുപടി. കഴിഞ്ഞദിവസം ഫേസ്ബുക്കിലൂടെ തന്നെ വിമര്‍ശിച്ച ഇ.പി. ജയരാജനെ കാനം പരിഹസിച്ചു. 'മേലാവി' എന്ന പദത്തിലൂടെ ജയരാജന്‍ മലയാള ഭാഷക്ക് സംഭാവന നല്‍കിയിരിക്കുകയാണ്. ഇ.പി. ജയരാജനും എം.എം. മണിയും വലിയ ആളുകളാണ്. എല്‍.ഡി.എഫിന് അവര്‍ നല്‍കിയ സംഭാവന വിലയിരുത്താന്‍ താന്‍ അശക്തനാണ്. പഴയ കൂട്ടുകെട്ടിന്റ ഓര്‍മകള്‍ തികട്ടി വരുന്നതിനാലാണ് കാനം ഇങ്ങനെ പെരുമാറുന്നതെന്ന ഇ.പി. ജയരാജെന്റ പ്രസ്താവനയോട് ആദ്യം പ്രതികരിക്കാതിരുന്ന കാനം പിന്നീട് ആഞ്ഞടിച്ചു.