നവജാത ശിശുവിനെ ഉപേക്ഷിക്കാന്‍ ക്വട്ടേഷന്‍

നവജാത ശിശുവിനെ ഉപേക്ഷിക്കാന്‍ ക്വട്ടേഷന്‍ കൊടുത്ത മാതാപിതാക്കളെ പോലീസ് തെരയുന്നു. കുഞ്ഞിനെ കളയാതെ ക്വട്ടേഷന്‍ വാങ്ങിയയാള്‍ പിടിയിലായി. എബിന്‍ജോസ് എന്നയാള്‍ക്കാണ് മാതാപിതാക്കള്‍ 40,000 രൂപയ്ക്ക് ക്വട്ടേഷന്‍ നല്‍കിയത് . ജനസേവാ ശിശുഭവന് കൈമാറുന്നതിനിടയില്‍ ക്വട്ടേഷന്‍ സ്വീകരിച്ചയാള്‍ പോലീസിന്റെ വലയില്‍ പെടുകയായിരുന്നു.

ഏപ്രില്‍ 13 ന് തനിക്ക് വഴിയരികില്‍ കിടന്ന് ഒരു കുഞ്ഞിനെ കിട്ടുകയായിരുന്നു എന്നാണ് ഇയാള്‍ ആദ്യം പോലീസിന് നല്‍കിയ മൊഴി. പിന്നീട് കൂടുതല്‍ ചോദ്യം ചെയ്യലില്‍ കുട്ടിയെ കളയാനായി പിതാവ് 40,000 രൂപയ്ക്ക് തന്നെ ഏല്‍പ്പിച്ചതാണെന്ന് ഇയാള്‍ മൊഴി നല്‍കി. അതിനിടയില്‍ കുട്ടിയുടെ പിതാവിനെ സംബന്ധിച്ച വിവരം കിട്ടിയിട്ടുണ്ടെന്ന് പോലീസ് വ്യക്തമാക്കി. എന്നാല്‍ കുഞ്ഞിന്റെ മാതാവിനെ തിരിച്ചറിയാനായിട്ടില്ല. ജോസിനെ പിടിച്ചെങ്കിലും കുട്ടിയുടെ പിതാവിനെ കണ്ടെത്താന്‍ കഴിയാത്തത് പോലീസിനെ കുഴയ്ക്കുന്നുണ്ട്. അതിനിടയില്‍ ഒരാഴ്ച മാത്രം പ്രായമുള്ള കുഞ്ഞിന്റെ മാതാവ് പ്രായപൂര്‍ത്തിയാകാത്ത പെണ്‍കുട്ടിയാണോ എന്ന സംശയം ഉയരുന്നുണ്ട്. എറണാകുളത്തെ അഭയകേന്ദ്രത്തിലാണ് കുട്ടിയിപ്പോള്‍. കേസില്‍ കുഞ്ഞിന്റെ മാതാവ് പ്രായപൂര്‍ത്തിയാകാത്ത ആളാണെങ്കില്‍ പിതാവിനെതിരേ ബാല പീഡനത്തിന് കേസെടുക്കേണ്ടി വരുമെന്നാണ് പോലീസ് പറയുന്നത്.