മൂന്നാര്‍ കൈയേറ്റം : ഒഴിപ്പിക്കല്‍ നിര്‍ത്തിയിട്ടില്ലെന്ന്‌ മുഖ്യമന്ത്രി

മൂന്നാറിലെ കൈയേറ്റങ്ങള്‍ ഒഴിപ്പിക്കുന്ന നടപടി നിര്‍ത്തിവച്ചിട്ടില്ലെന്ന്‌ മുഖ്യമന്ത്രി പിണറായി വിജയന്‍ നിയമസഭയില്‍. കൈയേറ്റക്കാരോട്‌ ഒരുവിട്ടുവീഴ്‌ചയുമുണ്ടാവില്ല. അതു ശക്‌തമായി നടപ്പാക്കും. ദീര്‍ഘകാലമായി അവിടെ താമസിക്കുന്ന സാധാരണക്കാരെ സംരക്ഷിക്കും. അതേസമയം വന്‍കിടകൈയേറ്റക്കാരോട്‌ ഒരു വിട്ടുവീഴ്‌ചയുമുണ്ടാവില്ല. സര്‍ക്കാരിന്റെ ദൃഢഹസ്‌തം അത്തരക്കാര്‍ക്കെതിരെ നീങ്ങും. അതുമായി ബന്ധപ്പെട്ടുണ്ടാകുന്ന പ്രശ്‌നങ്ങള്‍ ചര്‍ച്ചചെയ്യുമെന്ന്‌ പറഞ്ഞാല്‍ ഏതെങ്കിലും കൈയേറ്റക്കാര്‍ രക്ഷപ്പെടുമെന്നല്ല. ഇനി ആര്‍ക്കും കൈയേറണമെന്ന്‌ തോന്നാത്ത തരത്തിലുള്ള നടപടികള്‍ അവിടെ സ്വീകരിക്കുമെന്നും മുഖ്യമന്ത്രി വ്യക്‌തമാക്കി. തിരുവഞ്ചൂര്‍ രാധാകൃഷ്‌ണന്റെ അടിയന്തരപ്രമേയ നോട്ടീസിന്‌ മറുപടി നല്‍കുകയായിരുന്നു മുഖ്യമന്ത്രി.