കൃഷിവകുപ്പില്‍ ഉദ്യോഗസ്ഥ പോര് ; രാജു നാരായണ സ്വാമിയും ബിജു പ്രഭാകറും തമ്മില്‍ പരസ്യപ്പോര്

കൃഷിവകുപ്പ് സെക്രട്ടറി രാജു നാരായണ സ്വാമിയും ഡയറക്ടര്‍ ബിജു പ്രഭാകറും തമ്മില്‍ പരസ്യപ്പോര്. രാജു നാരായണ സ്വാമിക്കെതിരെ ഗുരുതര ആരോപണങ്ങളുമായി ബിജു പ്രഭാകര്‍ മാധ്യമങ്ങള്‍ക്കു മുന്നിലെത്തി. ബിജു പ്രഭാകറിന്റെ ഐ.എ.എസ് യോഗ്യത വരെ ചോദ്യം ചെയ്ത് രാജു നാരായണ സ്വാമിയും രംഗത്തെത്തി.

തന്നെ വിജിലന്‍സ് കേസില്‍ കുടുക്കാന്‍ സ്വാമി ശ്രമിക്കുന്നുവെന്നാണ് ബിജു പ്രഭാകറിന്റെ ആരോപണം. താന്‍ നടത്തുന്ന ഉത്തരവുകളുടെയും തീരുമാനങ്ങളുടെയും ഫയലുകള്‍ അദ്ദേഹം വിളിച്ചുവരുത്തി പരിശോധിക്കുകയാണെന്നും മറ്റ് സെക്ഷനുകളിലേക്ക് അയച്ചുനല്‍കുകയാണെന്നും ബിജു പ്രഭാകര്‍ ആരോപിച്ചു. അദ്ദേഹം ഒരു സ്വകാര്യ ചാനലിന്റെ കാര്‍ഷിക പരിപാടിയ്ക്ക് ഒരു കോടി രൂപ ചട്ടം ലംഘിച്ച് നല്‍കിയെന്നും ബിജു പ്രഭാകര്‍ പറഞ്ഞു. വിശ്വാസമില്ലാത്ത സെക്രട്ടറിയ്‌ക്കൊപ്പം ചേര്‍ന്ന് പ്രവര്‍ത്തിക്കാന്‍ കഴിയില്ലെന്നും അതിനാല്‍ അവധിയ്ക്കുള്ള അപേക്ഷ നല്‍കുകയാണെന്നും ബിജു പ്രഭാകര്‍ പറഞ്ഞു. ബിജു പ്രഭാകറിനെതിരെ അതിലും ഗുരുതരമായ ആരോപണവുമായി രാജു നാരായണ സ്വാമിയും രംഗത്തെത്തി. ബിജു പ്രഭാകറിന്റെ ഐ.എ.എസ് വ്യാജമാണെന്ന് ആരോപണമുണ്ട്. അതിനുള്ള ചില തെളിവുകളും തന്റെ കൈയിലുണ്ടെന്ന് രാജു നാരായണ സ്വാമി പറഞ്ഞു.