കാണാതായ സുഖോയ് വിമാനത്തില്‍ മലയാളിയും

അരുണാചല്‍ പ്രദേശില്‍ ചൈന അതിര്‍ത്തിക്ക് സമീപം കഴിഞ്ഞ ദിവസം കാണാതായ ഇന്ത്യയുടെ സുഖോയ് 30 എംകെഐ ജെറ്റില്‍ മലയാളിയും. കോഴിക്കോട്ട് പന്തീരാങ്കാവ് പന്നിയൂര്‍കുളം സ്വദേശിയായ ഫ്‌ലൈറ്റ് ലഫ്റ്റനന്റ് അച്ചുദേവിനെയാണ് കാണാതായത്. ചൊവ്വാഴ്ച രാവിലെ 10.30ഓടെയാണ് പരിശീലനപ്പറക്കലിനിടെ വിമാനം കാണാതായത്. പതിനൊന്നരയോടെ തെസാപൂര്‍ എയര്‍ സ്റ്റേഷനില്‍ നിന്നും 60 കിലോ മീറ്റര്‍ അകലെ വച്ചാണ് വിമാനവുമായി അവസാനം ആശയവിനിമയം നടത്തിയത്. ചൈനീസ് അതിര്‍ത്തിയില്‍ നിന്നും 172 കിലോ മീറ്റര്‍ മാത്രം അകലെയാണ് തെസാപൂര്‍ എയര്‍ സ്റ്റേഷന്‍. മുന്‍ ഐഎസ്ആര്‍ഒ ഉദ്യോഗസ്ഥന്‍ വള്ളിക്കുന്നുപറമ്പില്‍ സഹദേവന്റെയും ജയശ്രീയുടെയും മകനാണ് കാണാതായ അച്ചുദേവ്. മാതാപിതാക്കള്‍ സിക്കിമിലേക്ക് തിരിച്ചിട്ടുണ്ട്. വിമാനം കണ്ടെത്തുന്നതിനായി നാലു സംഘങ്ങളും കരസേനയുടെ ഒന്‍പതു സംഘങ്ങളും തിരച്ചില്‍ നടത്തുന്നു. മാര്‍ച്ചില്‍ ഇതേ വിഭാഗത്തില്‍ പെട്ട വിമാനം രാജസ്ഥാനില്‍ വച്ച് തകര്‍ന്നിരുന്നെങ്കിലും പൈലറ്റുമാര്‍ സുരക്ഷിതരായി രക്ഷപെട്ടിരുന്നു. ഈ വിഭാഗത്തില്‍ പെട്ട വിമാനങ്ങളുടെ തകരാറുകള്‍ പരിഹരിക്കുന്നതിനുള്ള കരാറില്‍ ഇന്ത്യയും റഷ്യയും സംയുക്തമായി ഒപ്പ് വച്ചിരുന്നു. ഇതിനോടകം ഏഴ് വിമാനങ്ങളാണ് ഇത്തരത്തില്‍ തകര്‍ന്നത്. എന്നാല്‍ സംഭവത്തെ പറ്റി ചൈനയ്ക്ക് അറിയില്ലെന്ന് ചൈന വ്യക്തമാക്കി.