പെട്രോള്‍ പമ്പ് ഉടമയെ തലയ്ക്കടിച്ചു കൊന്ന കേസില്‍ പ്രതികള്‍ക്ക് ജീവപര്യന്തം

ചെങ്ങന്നൂരില്‍ പെട്രോള്‍ പമ്പ് ഉടമയെ തലയ്ക്കടിച്ചു കൊന്ന കേസില്‍ പ്രതികള്‍ക്ക് ജീവപര്യന്തം തടവുശിക്ഷയും പിഴയും. ചെങ്ങന്നൂര്‍ സ്വദേശികളായ അനൂപ്കുമാര്‍, രാജീവ്, മനോജ് എന്നിവര്‍ക്കാണ് മാവേലിക്കര അഡീഷണല്‍ സെഷന്‍സ് കോടതി ശിക്ഷ വിധിച്ചത്. 35,000 രൂപ പ്രതികള്‍ പിഴയും ഒടുക്കണം.

2016 ഫെബ്രുവരി 18നാണ് പെട്രോള്‍ പമ്പ് ഉടമയായ മുരളീധരന്‍ നായര്‍ക്കു നേരെ ആക്രമണം നടന്നത്. മുരളീധരന്‍ നായരുടെ പമ്പില്‍ പെട്രോള്‍ അടിക്കാന്‍ എത്തിയ ഒന്നും മൂന്നും പ്രതികള്‍ പെട്രോള്‍ അടിക്കാന്‍ താമസം നേരിട്ടതിനെ ചൊല്ലി ജീവനക്കാരുമായി വഴക്കുണ്ടാക്കിയിരുന്നു. ബഹളം കേട്ട് എത്തിയ മുരളീധരന്‍ നായരോടും പ്രതികള്‍ വാക്കേറ്റമുണ്ടാക്കി. ഇതിനിടെ രണ്ടാം പ്രതി രാജീവിനെ വിളിച്ചുവരുത്തിയ പ്രതികള്‍ ബന്ധുവിനൊപ്പം ബൈക്കില്‍ വീട്ടിലേക്ക് പോവുകയായിരുന്ന മുരളീധരന്‍ നായരെ തടഞ്ഞുനിര്‍ത്തി തലയ്ക്കടിച്ചുവീഴ്ത്തുകയായിരുന്നു.തലയ്ക്കടിയേറ്റ മുരളീധരന്‍ നായര്‍ 24ന് മരണമടഞ്ഞു.