ഭര്‍ത്താവിനെ വെട്ടാന്‍ ശ്രമിച്ച സഹോദരനെ ഭാര്യ കുത്തിക്കൊന്ന സംഭവത്തില്‍ കൊല്ലപ്പെട്ടയാളുടെ കാമുകിക്കെതിരെ ആക്രമണം

ഭര്‍ത്താവിനെ വെട്ടാന്‍ ശ്രമിച്ച സഹോദരനെ ഭാര്യ കുത്തിക്കൊന്ന സംഭവത്തില്‍ കൊല്ലപ്പെട്ട യുവാവിന്റെ സംസ്‌ക്കാര ചടങ്ങിനിടയില്‍ കാമുകിക്കെതിരേ നാട്ടുകാരുടേയും ബന്ധുക്കളുടെയും ആക്രമണം. ഇന്നലെ ഭരണിക്കാവില്‍ കൊല്ലപ്പെട്ട അജീഷിന്റെ അടുപ്പക്കാരിയെ അറസ്റ്റ് ചെയ്യണമെന്ന് ആവശ്യപ്പെട്ട് നാട്ടുകാര്‍ ബഹളമുണ്ടാക്കുകയും ആക്രമിക്കാന്‍ ശ്രമിക്കുകയും ചെയ്‌തെങ്കിലും പോലീസ് എത്തി രംഗം ശാന്തമാക്കുകയായിരുന്നു.

കഴിഞ്ഞ ദിവസമായിരുന്നു ദീര്‍ഘകാലമായി തരാനുള്ള കടം തിരികെ ചോദിച്ചതിന് ഭരണിക്കാവ് തെക്കേ മങ്കുഴി പാക്കു കണ്ടത്തില്‍ പ്രശാന്തിനെ സഹോദരന്‍ അജീഷ് വടിവാള്‍ കൊണ്ട് ആക്രമിക്കാന്‍ എത്തിയത്. ഇത് കണ്ടു നിന്ന പ്രശാന്തിന്റെ ഭാര്യ അഞ്ജു കയ്യിലിരുന്ന കറിക്കത്തി കൊണ്ടു കുത്തുകയും ആഴത്തില്‍ മുറിവേറ്റ അജീഷ് പിന്നീട് മരണമടയുകയുമായിരുന്നു. സംഭവത്തില്‍ അഞ്ജുവിനെ പോലീസ് അറസ്റ്റ് ചെയ്യുകയുമുണ്ടായി. അജീഷിന് മൂന്നര വര്‍ഷം മുമ്പ് അഞ്ജു ഒന്നര ലക്ഷം രൂപ കടം നല്‍കിയതുമായി ബന്ധപ്പെട്ടായിരുന്നു പ്രശ്‌നങ്ങള്‍ തുടങ്ങിയത്.