സബ്കലക്ടര്‍ ശ്രീറാം വെങ്കിട്ടറാമിനെ മാറ്റാനുള്ള നീക്കത്തിനെതിരെ മന്ത്രി ഇ.ചന്ദ്രശേഖരന്‍

ദേവികുളം സബ്കലക്ടര്‍ ശ്രീറാം വെങ്കിട്ടറാമിനെ മാറ്റാനുള്ള നീക്കത്തില്‍ കടുത്ത എതിര്‍പ്പുമായി റവന്യൂ മന്ത്രി ഇ.ചന്ദ്രശേഖരന്‍. കോവളം കൊട്ടാരം സ്വകാര്യ റിസോര്‍ട്ടിന് വിട്ടുനല്‍കാനുള്ള നിര്‍ദേശത്തെയും റവന്യുമന്ത്രി മന്ത്രിസഭാ യോഗത്തില്‍ എതിര്‍ത്തു.

ശ്രീറാമിനെ നീക്കണമെന്ന ആവശ്യം ചര്‍ച്ച ചെയ്യാന്‍ യോഗം വിളിക്കണമെന്ന മുഖ്യമന്ത്രിയുടെ നിര്‍ദേശത്തിനെതിരെയാണ് റവന്യൂമന്ത്രി മുഖ്യമന്ത്രിക്ക് കത്ത് നല്‍കി. യോഗം വിളിക്കുന്നതിന് നിയമപരമായ പ്രശ്‌നങ്ങളുണ്ട്. റവന്യൂ ഉദ്യോഗസ്ഥര്‍ മൂന്നാറില്‍ നടപ്പാക്കുന്നത് ഇടതുപക്ഷ സര്‍ക്കാരിന്റെ നയമാണ്. നിയമപരമായ കാര്യങ്ങള്‍ മാത്രമാണ് ചെയ്യുന്നത്. പരാതികള്‍ നല്‍കിയ ചില വ്യക്തികളുടെ കയ്യേറ്റം സാധൂകരിക്കുന്നത് സംബന്ധിച്ച അപേക്ഷകള്‍ സര്‍ക്കാര്‍ നേരത്തെ തള്ളിയതാണ്. ഇത്തരക്കാരെ അനുകൂലിച്ചാല്‍ ഭാവിയില്‍ പ്രത്യാഘാതമുണ്ടാകുമെന്നും മുഖ്യമന്ത്രിക്ക് നല്‍കിയ കത്തില്‍ മന്ത്രി പറഞ്ഞു.