വില്ലേജ് ഓഫീസിലെ കര്‍ഷകന്റെ മരണം : മൃതദേഹം മാറ്റാനുള്ള പോലീസിന്റെ നീക്കത്തില്‍ സംഘര്‍ഷം

കര്‍ഷകന്‍ വില്ലേജ് ഓഫീസില്‍ തൂങ്ങിമരിച്ച സംഭവത്തില്‍ മൃതദേഹം അഴിച്ചുമാറ്റാനുള്ള പോലീസിന്റെ നീക്കത്തില്‍ സംഘര്‍ഷം. കളക്ടറോ തഹസീല്‍ദാരോ എത്താതെ മൃതദേഹം അഴിച്ചുമാറ്റാന്‍ അനുവദിക്കില്ലെന്ന് നാട്ടുകാര്‍ പറഞ്ഞു. വില്ലേജ് അസിസ്റ്റന്റും വില്ലേജ് മാനുമാണ് മരണത്തിനുത്തരവാദികളെന്നും നികുതിയടയ്ക്കാനുള്ള ജോയിയുടെ ആവശ്യം ഇവര്‍ കൈക്കൂലി ആവശ്യപ്പെട്ട് നിരാകരിച്ചെന്നും ബന്ധുക്കള്‍ പറഞ്ഞു.

ഭൂനികുതി സ്വീകരിക്കുന്നതുമായി ബന്ധപ്പെട്ട പ്രശ്‌നത്തില്‍ മനംനൊന്ത് ചെമ്പനോട സ്വദേശി കാവില്‍ പുരയിടത്തില്‍ ജോയി (തോമസ്) യെയാണ് ഇന്നലെ രാത്രി ഒന്‍പതരയോടെയാണ് കോഴിക്കോട് ചെമ്പനോട വില്ലേജ് ഓഫീസിന്റെ ഗ്രില്ലില്‍ തൂങ്ങിമരിച്ചനിലയില്‍ കണ്ടെത്തിയത്. ഭാര്യയുടെ പേരിലുള്ള സ്ഥലത്തിന്റെ നികുതി സ്വീകരിക്കുന്നതുമായി ബന്ധപ്പെട്ട് പ്രശ്‌നം നിലനിന്നിരുന്നു. ഉദ്യോഗസ്ഥര്‍ക്കെതിരേ കൊലക്കുറ്റത്തിന് കേസെടുക്കണമെന്നും നാട്ടുകാര്‍ പറഞ്ഞു. സംഭവം ജില്ലാ കളക്ടര്‍ അന്വേഷിക്കുമെന്നും ഇക്കാര്യവുമായി ബന്ധപ്പെട്ട ധനസഹായം മുഖ്യമന്ത്രിയുമായി ആലോചിച്ച് തീരുമാനമെടുക്കുമെന്നും റവന്യൂവകുപ്പ്മന്ത്രി ഇ ചന്ദ്രശേഖരന്‍ വ്യക്തമാക്കി.