തലസ്ഥാനത്ത്‌ സമാധാനം നിലനിര്‍ത്താന്‍ സി.പി.എം ബി.ജെ.പി യോഗത്തില്‍ ധാരണ

തലസ്ഥാനത്ത്‌ നടന്ന അക്രമ സംഭവങ്ങളില്‍ ശാശ്വത പരിഹാരം തേടി സി.പി.എം-ബി.ജെ.പി ജില്ലാ നേതാക്കള്‍ സമാധാന ചര്‍ച്ച നടത്തി. നടന്ന സംഭവങ്ങളുടെ എല്ലാ കാര്യങ്ങളും ചര്‍ച്ച ചെയ്തുവെന്ന് യോഗത്തിനു ശേഷം സി.പി.എം നേതാവ് ആനാവൂര്‍ നാഗപ്പന്‍ മാധ്യമങ്ങളോട് പറഞ്ഞു. ആക്രമണങ്ങള്‍ അപലപിക്കപ്പെടേണ്ടതും മേലില്‍ ആവര്‍ത്തിക്കപ്പെടാന്‍ പാടില്ലാത്തതുമാണ്. വീടുകളും പാര്‍ട്ടി ഓഫീസുകളും ആക്രമിക്കപ്പെടുന്നത് ഒരിക്കലും അംഗീകരിക്കപ്പെടാന്‍ പാടില്ല. തിരുവനന്തപുരം നഗരത്തില്‍ സമാധാനം നിലനിര്‍ത്തിക്കൊണ്ടുപോകാന്‍ സി.പി.എമ്മും ബി.ജെ.പിയും അതീവ ശ്രദ്ധയോടെ ഇടപെടല്‍ നടത്തണം. ഏതെങ്കിലും പ്രശ്‌നമുണ്ടായാല്‍ ഇരുപാര്‍ട്ടികളുടേയും ജില്ലാ നേതൃത്വം ഇടപെട്ട് ഉടന്‍ പ്രശ്‌ന പരിഹാരം ഉണ്ടാക്കും. പ്രകോപനപരമായ ഒരു പ്രസ്താവനയും പാടില്ലെന്നും തീരുമാനിച്ചുവെന്ന് ആനാവൂര്‍ നാഗപ്പന്‍ അറിയിച്ചു.

ചര്‍ച്ച പൊതുവേ ആരോഗ്യപരമായിരുന്നുവെന്ന് ബി.ജെ.പി ജില്ലാ നേതാവ് അഡ്വ.എസ് സുരേഷ് വ്യക്തമാക്കി. തിരുവനന്തപുരം സമാധാനം ആഗ്രഹിക്കുന്നവരുടെ നാടാണ്. വികസനം ഏറെ വരേണ്ട നാടാണ്. ഈ നഗരത്തില്‍ അക്രമങ്ങള്‍ ഒഴിവാക്കപ്പെടണം.