പുരോഗമനം പറയുന്നവര്‍ മൃത്യൂഞ്ജയ ഹോമം നടത്തണമെന്ന് പറഞ്ഞ ശശികലയ്‌ക്കെതിരെ മുഖ്യമന്ത്രി !

ഹിന്ദു ഐക്യവേദി നേതാവ് കെ.പി ശശികലയ്‌ക്കെതിരെ മുഖ്യമന്ത്രി പിണറായി വിജയന്‍. പുരോഗമനം പറയുന്നവര്‍ മൃത്യൂഞ്ജയ ഹോമം നടത്തണമെന്ന് പറയാന്‍ ഈ നാട്ടില്‍ ആളുണ്ടായിരിക്കുന്നു. ഇത്തരം പ്രവണതകള്‍ കേരളത്തിന്റെ അന്തരീക്ഷം മാറ്റിമറിക്കുമെന്നും മുഖ്യമന്ത്രി പറഞ്ഞു.

ഇന്നലെ പറവൂരില്‍ നടന്ന യോഗത്തിലായിരുന്നു ശശികലുടെ വിവാദ പ്രസംഗം. എതിര്‍ക്കുന്നതിന് അനുസരിച്ച് വളരുന്നതാണ് ആര്‍എസ്എസ് അതിനാല്‍ എതിര്‍ക്കുന്നവരെ കൊന്നു കളയേണ്ട ഗതികേട് ആര്‍എസ്എസിനില്ല. എന്നാല്‍ അങ്ങനെയൊരു കൊലപാതകം കോണ്‍ഗ്രസിന് ആവശ്യമാണ് എന്നും ശശികല പറഞ്ഞു.

ഇവിടുത്തെ മതേതരവാദികളായ എഴുത്തുകാരോട് പറയാനുള്ളത്, മക്കളെ ആയുസ് വേണമെങ്കില്‍ മൃത്യുഞ്ജയ ഹോമം നടത്തിക്കോളിന്‍. എപ്പഴാ, എന്താ വരുകാ എന്ന് പറയാന്‍ ഒരു പിടുത്തോം ഉണ്ടാകില്ല. ഓര്‍ത്ത് വെക്കാന്‍ പറയുകയാണ് മൃത്യുഞ്ജയ ഹോമം അടുത്തുള്ള ശിവക്ഷേത്രത്തിലെങ്ങാനും പോയി കഴിച്ചോളിന്‍. അല്ലെങ്കില്‍ ഗൗരിമാരെ പ്പോലെ നിങ്ങളും ഇരകളാക്കപ്പെടും എന്നായിരുന്നു ശശികലയുടെ പ്രസംഗം. ഡിവൈഎഫ്‌ഐയും വിഡി സതീശന്‍ എംഎല്‍എയും നല്‍കിയ പരാതിയില്‍ ശശികലയ്‌ക്കെതിരെ കേസെടുക്കാന്‍ ഡിജിപി നിര്‍ദ്ദേശം നല്‍കി. എറണാകുളം റൂറല്‍ എസ്പിക്കാണ് അന്വേഷണ ചുമതല.