ഹിന്ദുത്വം ആളെ സ്വീകരിക്കുന്നതെന്ന് ഒരാളുടെ ഭക്ഷണമോ വസ്ത്രമോ നോക്കിയല്ലെന്ന് മോഹന്‍ ഭഗവത്

ഹിന്ദുത്വം അതിലേക്ക് ആളെ സ്വീകരിക്കുന്നതെന്ന് ഒരാളുടെ ഭക്ഷണമോ വസ്ത്രമോ നോക്കിയല്ലെന്ന് ആര്‍എസ്എസ് തലവന്‍ മോഹന്‍ ഭഗവത്. സദാചാര പോലീസിംഗും അസഹിഷ്ണുതയും വിഷയമാക്കിയുള്ള നടപ്പ് രാഷ്ട്രീയവുമായി ബന്ധപ്പെട്ട ചര്‍ച്ചയിലായിരുന്നു മോഹന്‍ ഭഗവതിന്റെ പ്രസ്താവന.

ബീഫിന്റെയും പശുവിന്റെയും പേരില്‍ ഹിന്ദുത്വവാദികളാല്‍ ആള്‍ക്കാര്‍ കൊല്ലപ്പെടുകയും വ്യാപകമായി ആക്രമിക്കപ്പെടുകയും ചെയ്യുന്ന സാഹചര്യത്തിലാണ് ബിജെപിയേയും മറ്റ് ഹിന്ദു സംഘടനകളുടെയും തള്ളി ഭഗവത് രംഗത്ത് വന്നത്. ബിജെപി ജനറല്‍ സെക്രട്ടറി രാം മാധവിന്റെ ഇന്ത്യാ ഫൗണ്ടേഷന്റെ നേതൃത്വത്തില്‍ സംഘടിപ്പിക്കപ്പെട്ട 50 രാജ്യങ്ങളില്‍ നിന്നുള്ള അംബാസഡര്‍മാരും നയതന്ത്രപ്രതിനിധികളും പങ്കെടുത്ത ചടങ്ങില്‍ നടന്ന ചോദ്യോത്തര വേളയിലായിരുന്നു മോഹന്‍ ഭഗവത് പങ്കെടുത്തത്.

ഹിന്ദുത്വം ഒരാള്‍ എന്തു ധരിക്കുന്നു എന്തു കഴിക്കുന്നു എന്ന് നോക്കാതെ അവരെ അവരായി തന്നെ സ്വീകരിക്കുന്നതാണ്. ഹിന്ദുത്വം ഒരു തരത്തിലുമുള്ള പ്രത്യേക വേഷഭൂഷാദിയെ കുറിച്ചോ പ്രത്യേക ഭക്ഷണത്തെക്കുറിച്ചോ പറയുന്നില്ല. എപ്പോഴും മാറിക്കൊണ്ടിരിക്കുന്നു എന്നത് തന്നെയാണ് ഹിന്ദുത്വത്തിന്റെ ഗുണമെന്നും മോഹന്‍ ഭഗവത് പറഞ്ഞു.