തിരുവനന്തപുരത്ത് നിന്നും പോയ വിദ്യാര്‍ത്ഥികളുടെ ബസ് മേട്ടുപ്പാളയത്ത് കൂട്ടിയിടിച്ചു

മേട്ടുപ്പാളയം: തിരുവനന്തപുരം നെയ്യാറ്റിന്‍കര വയലൂര്‍ കാരുണ്യമിഷന്‍ സ്‌കൂളിലെ ഭിന്നശേഷിക്കാരായ വിദ്യാര്‍ത്ഥികള്‍ ഉള്‍പ്പെടെ സഞ്ചരിച്ച ബസ് തമിഴ് നാട്ടില്‍ അപകടത്തില്‍ പെട്ടു. ബസില്‍ 45 പേരുണ്ടായിരുന്നു.

വിദ്യാര്‍ത്ഥികള്‍ സഞ്ചരിച്ച ബസ് തമിഴ്‌നാട് സര്‍ക്കാര്‍ ബസുമായി കൂട്ടിയിടിക്കുകയായിരുന്നു. വിദ്യാര്‍ത്ഥികളില്‍ ആര്‍ക്കും പരിക്കില്ല. തമിഴ്‌നാട് സര്‍ക്കാര്‍ ബസിന്റെ ഡ്രൈവര്‍ക്ക് പരിക്കേറ്റു.ഊട്ടി~മേട്ടുപ്പാളയം റോഡില്‍ കല്ലാറിനടുത്ത് പത്തടിപ്പാലത്ത് വൈകിട്ട് അഞ്ചോടെയായിരുന്നു അപകടം. മുപ്പത് വിദ്യാര്‍ത്ഥികളാണ് കാരുണ്യമിഷന്‍ സ്‌കൂളിലെ അധ്യാപിക അനിതയുടെ നേതൃത്വത്തില്‍ യാത്ര തിരിച്ചത്.

രണ്ട് ദിവസം മുന്പാണ് യാത്ര തിരിച്ചത്. അപകടത്തില്‍ പെട്ട രണ്ട് ബസുകളുടെയും മുന്‍ വശത്തേത് ഉള്‍പ്പെടെ ചില്ലുകള്‍ തകര്‍ന്നു. അപകടത്തെ തുടര്‍ന്ന് ഗതാഗത മൂന്ന് മണിക്കൂറുകളോളം തടസപ്പെട്ടു. ബസ് മേട്ടുപ്പാളയം പൊലീസ് സ്റ്റേഷനിലെത്തിച്ചിട്ടുണ്ട്