ഇനി മെട്രോ മഹാരാജാസ് വരെ;ഉദ്ഘാടനം ഇന്ന്

കൊച്ചി മെട്രോ ഇന്നു മുതല്‍ മഹാരാജാസ് വരെ.ആലുവ മുതല്‍ പാലാരിവട്ടം വരെയുള്ള സര്‍വ്വീസാണ് അഞ്ചു കിലോമീറ്റര്‍ കൂടി നീട്ടിയിരിക്കുന്നത്.ഈ സര്‍വ്വീസിന്റെ ഉദ്ഘാടനം ഇന്ന് 11 മണിയ്ക്ക് മുഖ്യമന്ത്രി പിണറായി വിജയന്‍ നിര്‍വ്വഹിയ്ക്കും.കേന്ദ്ര മന്ത്രി ഹര്‍ദീപ് സിങ് പൂരി അദ്യക്ഷനാകും.എറണാകുളം ടൗണ്‍ ഹാളിലാണ് പരിപാടി.

മെട്രോയുടെ ആലുവ മുതല്‍ പാലാരിവട്ടം വരെയുള്ള 13 കിലോമീറ്റര്‍ ദൂരം ജൂണ്‍ 17നു പ്രധാനമന്ത്രി നരേന്ദ്ര മോദിയാണ് ഉദ്ഘാടനം ചെയ്തത്. പാലാരിവട്ടം - മഹാരാജാസ് ലൈന്‍ കൂടി തുറക്കുന്നതോടെ മൊത്തം മെട്രോ റൂട്ട് 18 കിലോമീറ്റര്‍ ആകും. അഞ്ചു സ്റ്റേഷനുകള്‍ കൂടി പുതുതായുണ്ടാകും. ഹൈക്കോടതി, സൗത്ത്, നോര്‍ത്ത് റെയില്‍വേ സ്റ്റേഷനുകള്‍, ആശുപത്രികള്‍, സര്‍ക്കാര്‍ ഓഫിസുകള്‍, ബ്രോഡ്വേ, എംജി റോഡ്, കെഎസ്ആര്‍ടിസി ബസ് സ്റ്റേഷന്‍ തുടങ്ങി ഒട്ടേറെ കേന്ദ്രങ്ങളിലേക്ക് ഇനി മെട്രോയില്‍ പോകാം. സ്ഥിരം യാത്രക്കാരെത്തുന്നതോടെ മെട്രോ സര്‍വീസുകളില്‍ തിരക്കേറും.