തൊഴിലാളികളുടെ പ്രതിഷേധം ;കെഎസ്ആര്‍ടിസിയുടെ സ്‌കാനിയ സര്‍വ്വീസ് ഉദ്ഘാടനം ചെയ്യാതെ ചാണ്ടി മടങ്ങി

തിരുവനന്തപുരം:കെഎസ്ആര്‍ടിസി പുതുതായി ആരംഭിച്ച വാടക സ്‌കാനിയ ബസ് സര്‍വ്വീസ് തൊഴിലാളികളുടെ പ്രതിഷേധത്തെ തുടര്‍ന്ന് ഉദ്ഘാടനം ഉപേക്ഷിച്ച് മന്ത്രി മടങ്ങി.സിഐടിയു ഒഴികെയുള്ള സംഘടനകള്‍ മന്ത്രി സ്‌കാനിയ സര്‍വ്വീസ് ഉദ്ഘാടനം ചെയ്യുന്നതിനെ എതിര്‍ത്തു.തുടര്‍ന്ന് മന്ത്രി ഫ്‌ലാഗ് ഓഫ് ചെയ്യാതെ സ്‌കാനിയ ഓടിതുടങ്ങി

കെഎസ്ആര്‍ടിസി സ്വകാര്യവല്‍ക്കരിക്കാന്‍ നീക്കം നടത്തുന്നതിന്റെ ഭാഗമായാണ് വാടക സ്‌കാനിയ സര്‍വ്വീസുകള്‍ക്കെടുത്തതെന്നാരോപിച്ചായിരുന്നു തൊഴിലാളികള്‍ പ്രതിഷേധിച്ചത്.മന്ത്രിയെ ഉദ്ഘാടനം ചെയ്യാന്‍ അനുവദിക്കില്ലെന്ന് പ്രതിഷേധക്കാര്‍ ശക്തമായി വാദിച്ചതോടെ ഉദ്ഘാടനം ഉപേക്ഷിച്ചു.

കെഎസ്ആര്‍ടിസി മുന്‍ എംഡി എം.ജി.രാജമാണിക്യമാണ് വാടകയ്ക്ക് ബസ് എടുത്ത് ഓടിക്കുന്ന ആശയം മുന്നോട്ടുവച്ചത്. ഒരു കോടിയോളം രൂപ വിലവരുന്ന സ്‌കാനിയ ബസുകള്‍ വാങ്ങി സര്‍വീസ് നടത്തുന്നതിലും ലാഭകരമാകും വാടക ബസ് എന്ന ആശയം മുന്‍നിര്‍ത്തിയാണ് കോര്‍പ്പറേഷന്‍ മുന്നോട്ടുപോകുന്നത്. വാടക ബസിന്റെട അറ്റകുറ്റപ്പണികളും സ്‌കാനിയ കന്പനിയുടെ ചുമതലയായിരിക്കും എന്നതിനാല്‍ കെഎസ്ആര്‍ടിസിക്ക് ചിലവ് കുറയും എന്നാണ് കരുതപ്പെടുന്നത്. എന്നാല്‍ തീരുമാനം പ്രഖ്യാപിച്ചപ്പോള്‍ തന്നെ എതിര്‍പ്പുമായി പ്രതിപക്ഷ യൂണിയനുകള്‍ ഉള്‍പ്പടെ രംഗത്തുവന്നിരുന്നു