ആശ്രിത ലെവി ഒറ്റത്തവണ : മലയാളികള്‍ സൗദി വിടുന്നു !

സൗദിയില്‍ വിദേശികളുടെ കുടുംബാംഗങ്ങള്‍ക്കുള്ള ആശ്രിത ലെവി തവണകളായി അടയ്ക്കാന്‍ പറ്റില്ലെന്നും ഒരു വര്‍ഷത്തേക്കുള്ള ലെവി ഒറ്റത്തവണയായി മുന്‍കൂറായി അടയ്ക്കണമെന്നും ജവാസാത്ത് ഡയറക്ടറേറ്റ് (പാസ്‌പോര്‍ട്ട് വിഭാഗം) അറിയിച്ചു. ഭീമമായ തുക താങ്ങാന്‍ കഴിയാത്തതിനാല്‍ മലയാളികളില്‍ ഭൂരിപക്ഷവും കുടുംബത്തെ നാട്ടിലേക്കു തിരിച്ചയയ്ക്കുകയാണ്.

ജൂലൈ ഒന്നിനാണ്‌ സൗദിയില്‍ ആശ്രിത ലെവി നിലവില്‍ വന്നത്. വിദേശികളുടെ കുടുംബാംഗങ്ങള്‍ക്ക് പ്രതിമാസം 100 റിയാല്‍ വീതമാണു ലെവി. 2018 ജൂലൈ ഒന്നുമുതല്‍ ഇത് ഇരട്ടിയാകും (ഏകദേശം 40,800 രൂപ). ഭാര്യയും രണ്ടു കുട്ടികളും ഒപ്പമുള്ള കുടുംബനാഥന്‍ നല്‍കേണ്ടത് 7200 റിയാല്‍ (ഏകദേശം 1,22,400 രൂപ.) 2019 ജൂലൈ മുതല്‍ ഓരോ ആള്‍ക്കും 300 റിയാലാണു ലെവി നിശ്ചയിച്ചിരിക്കുന്നത്. 2020 ജൂലൈയില്‍ ഇത് 400 റിയാലാകും. കുറഞ്ഞ വേതനക്കാരെയും കൂടുതല്‍ അംഗങ്ങളുള്ള കുടുംബങ്ങളെയുമാണ് ആശ്രിത ലെവി ഏറ്റവുമധികം ബാധിക്കുക. ഇത്രയും ഭീമമായ തുക മുന്‍കൂര്‍ അടയ്ക്കാന്‍ കഴിയില്ലെന്നതിനാലാണ് പലരും കുടുംബത്തെ തിരിച്ചയയ്ക്കുന്നത്.