സുകുമാരക്കുറുപ്പ് സൗദി അറേബ്യയിൽ ; ഇപ്പോഴത്തെ പേര് മുസ്തഫ !

കേരള പൊലീസിനെ മുഴുവൻ മൂന്ന് പതിറ്റാണ്ടായി വട്ടം ചുറ്റിക്കുന്ന സുകുമാരക്കുറുപ്പ് എന്ന പിടികിട്ടാപ്പുള്ളി സൗദി അറേബ്യയിൽ സുരക്ഷിതനെന്ന് മംഗളം റിപ്പോർട്ട് ചെയ്യുന്നു. ഇസ്ലാം മതം സ്വീകരിച്ച് സുകുമാരക്കുറുപ്പെന്ന പേരും മാറ്റി സൗദിയിൽ സുരക്ഷിതനായി കഴിയുകയാണ് സുകുമാരക്കുറുപ്പ്.

ഇസ്ലാം മതം സ്വീകരിച്ച സുകുമാരക്കുറുപ്പിന്റെ ഇപ്പോഴത്തെ പേര് മുസ്തഫയെന്നാണ്. ഇപ്പോൾ വയസ്സ് 72. നാട്ടിലേക്ക് വരണമെന്ന് ആഗ്രഹമുണ്ടെങ്കിലും പൊലീസിനേയും നിയമക്കുരുക്കിനേയും ഭയന്നാണ് വരാത്താതെന്നും ബന്ധുക്കൾക്ക് വിവരം ലഭിച്ചതായി മംഗളം റിപ്പോർട്ട് ചെയ്യുന്നു. സൗദിയിലെ മദീനയിലാണ് കുറുപ്പ് ഇപ്പോൾ താമസിക്കുന്നത്.

കുറുപ്പിന്റെ ഭാര്യയും മക്കളും കുവൈത്തിലാണു താമസം. ഇവർ കുവൈത്തിൽ സ്ഥിരതാമസമാക്കിയതോടെ കുറുപ്പ് ഗൾഫ് രാജ്യങ്ങളിൽ എവിടെയോ ഉണ്ടെന്ന് പൊലീസിനു വിവരം ലഭിച്ചു. എന്നാൽ, ഇന്റർപോളിന്റെ സഹായത്തോടെ കുറുപ്പിനെ കണ്ടെത്താൻ ഒരു ശ്രമവും നടന്നില്ല. സൗദിയിൽ നിന്നും കുറുപ്പ് കുവൈത്തിലെത്തി കുടുംബക്കാരെ കാണാറുണ്ടെന്നാണ് വിവരം.

ചാക്കോ വധക്കേസിൽ ഒളിവിൽ പോയ സുകുമാരക്കുറുപ്പിനെ പൊലീസ് അന്വേഷിച്ചെങ്കിലും കണ്ടെത്താൻ കഴിയാതെ വന്നതോടെ പിടികിട്ടാപ്പുള്ളി എന്ന് പ്രഖ്യാപിക്കുകയായിരുന്നു.