ഹാദിയ കേസ്‌ : കോടതി വിധി സ്വാഗതം ചെയ്ത് പിതാവ്

ഹാദിയയെ പഠിക്കാന്‍ അയച്ചുകൊണ്ടുള്ള സുപ്രീം കോടതി വിധി സ്വാഗതം ചെയ്ത് പിതാവ് അശോകന്‍. കോടതിവിധികള്‍ ഒരിക്കലും മോശമാകില്ല. വിധികള്‍ എപ്പോഴും നല്ലതാണ്. അതിനെ അംഗീകരിക്കുന്നു. കുടുംബത്തിന്റെ ആശങ്ക പരിഹരിക്കുന്ന വിധിയാണ്. ഇതുവരെയുള്ള നിയമപോരാട്ടത്തില്‍ വിജയം തനിക്കൊപ്പമാണെന്നും അശോകന്‍ പറഞ്ഞു. ഹാദിയയെ വീട്ടുതടങ്കലില്‍ പാര്‍പ്പിച്ചിരുന്നില്ല. നാലു പോലീസുകാര്‍ മുറിയില്‍ ഒപ്പമുണ്ടായിരുന്നു. വീട്ടിലും പോലീസുകാരുണ്ടായിരുന്നു. പുറത്തിറങ്ങി നടക്കാന്‍ അനുവദിച്ചിട്ടുണ്ട്. അതിനു തയ്യാറാകാതിരുന്ന കുട്ടിയെ എടുത്തുകൊണ്ട് പോകാന്‍ കഴിഞ്ഞിയില്ലല്ലോ എന്നും മാധ്യമപ്രവര്‍ത്തകരുടെ ചോദ്യത്തിന് മറുപടിയായി അശോകന്‍ പറഞ്ഞു.

ഷെഫിന്‍ ജഹാനെ കുറിച്ച് താനും എന്‍.ഐ.എയും ഉന്നയിച്ച ആശങ്ക കോടതിക്ക് ബോധ്യപ്പെട്ടിട്ടുണ്ട്. അതുകൊണ്ടാണല്ലോ അയാളുടെ സംരക്ഷണത്തില്‍ വിടാതിരുന്നത്. ഷെഫിന്‍ ജഹാന് ഹാദിയയെ കാണാന്‍ കോടതി അനുമതി നല്‍കിയിട്ടില്ല. കോടതിയുടെ നിരീക്ഷണങ്ങളില്‍ താന്‍ പൂര്‍ണ്ണ തൃപ്തനാണെന്നും അശോകന്‍ വ്യക്തമാക്കി.