തോമസ്‌ ചാണ്ടി മനഃപൂര്‍വം കായല്‍ കൈയേറ്റം നടത്തിയതല്ല , ചാണ്ടിക്കെതിരേ തല്‍ക്കാലം കേസില്ലെന്നു ഹൈക്കോടതി !

തോമസ്‌ ചാണ്ടി മനഃപൂര്‍വം കായല്‍ കൈയേറ്റം നടത്തിയതായി നിലവിലുള്ള രേഖകളുടെ അടിസ്‌ഥാനത്തില്‍ പറയാന്‍ കഴിയില്ലെന്നു ഹൈക്കോടതി. ഇപ്പോള്‍ അദ്ദേഹത്തിനെതിരേ കേസ്‌ രജിസ്‌റ്റര്‍ ചെയ്യേണ്ട സാഹചര്യമില്ലെന്നും കായല്‍ കൈയേറ്റവുമായി ബന്ധപ്പെട്ട രണ്ടു ഹര്‍ജികള്‍ തീര്‍പ്പാക്കിക്കൊണ്ട്‌ കോടതി വ്യക്‌തമാക്കി.

തോമസ്‌ ചാണ്ടി കൈയേറ്റം നടത്തിയെന്നു പറയപ്പെടുന്ന ഭാഗത്ത്‌ വെള്ളം കയറിക്കിടക്കുന്നതിനാല്‍ സര്‍വേ നടത്താന്‍ കഴിഞ്ഞില്ലെന്ന്‌ ആലപ്പുഴ ജില്ലാ കലക്‌ടര്‍ ടി.വി. അനുപമയുടെ റിപ്പോര്‍ട്ടില്‍ പറയുന്നു. മൂന്നു മാസത്തിനകം സര്‍വേ നടത്തി ആറു മാസത്തിനകം നടപടി പൂര്‍ത്തിയാക്കണമെന്നു കോടതി പറഞ്ഞു. തോമസ്‌ ചാണ്ടി ഉള്‍പ്പെടെ ബന്ധപ്പെട്ട കക്ഷികളുടെ ഭാഗവും കേള്‍ക്കണം. വിവാദഭൂമി നെല്‍വയല്‍-തണ്ണീര്‍ത്തട സംരക്ഷണ നിയമത്തിന്റെ പരിധിയില്‍ വരുന്നതാണെന്ന പരാതി പ്രാദേശികതല നിരീക്ഷണ സമിതി പരിശോധിക്കണം.