ദുബായിൽ തട്ടിപ്പുകേസിൽ പെട്ടത് കോടിയേരിയുടെ മകൻ ; ഇക്കാര്യത്തില്‍ കോടിയേരി ബാലകൃഷ്ണനും പിണറായി വിജയനും മൗനം വെടിയണമെന്ന്‌ കെ.സുരേന്ദ്രൻ !

സംസ്ഥാനത്തെ മുതിർന്ന സിപിഎം നേതാവിന്‍റെ മകനെതിരെ ഉയര്‍ന്ന കോടികളുടെ തട്ടിപ്പുകേസിൽ രൂക്ഷ വിമർശനങ്ങളുമായി ബിജെപി സംസ്ഥാന ജനറൽ സെക്രട്ടറി കെ.സുരേന്ദ്രൻ. മാധ്യമങ്ങൾ തുടർച്ചയായി സിപിഎം നേതാവ് എന്ന് ആവർത്തിക്കേണ്ട ആവശ്യമില്ലെന്നും ആ നേതാവ് കോടിയേരി ബാലകൃഷ്ണനും മകൻ ബിനോയ് കോടിയേരിയുമാണെന്ന് ഏവർക്കും അറിയാവുന്ന കാര്യമാണെന്നും സുരേന്ദ്രൻ വ്യക്തമാക്കി. ആരോപണം ഗുരുതരമാണ്. പാർട്ടി നേതാവിനെതിരെയല്ല ആരോപണം എന്നതിനാൽ അന്വേഷിക്കില്ലെന്ന സിപിഎം നിലപാട് തെറ്റാണെന്നും സുരേന്ദ്രൻ തന്റെ ഫേസ്ബുക്ക് പോസ്റ്റില്‍ പറഞ്ഞു.

കോടിയേരി ബാലകൃഷ്ണൻറെ മകൻ ബിനോയ് കോടിയേരിക്കെതിരെയുള്ള ആരോപണം ഗൗരവതരമാണ്. ഈ തട്ടിപ്പുകേസ്സ് സംബന്ധിച്ച വിവരങ്ങൾ പാർട്ടി അഖിലേന്ത്യാ ജനറൽ സെക്രട്ടറിയടക്കം എല്ലാവർക്കും ബോധ്യമുള്ളതാണ്. അടിയന്തിര നടപടി ഇക്കാര്യത്തിൽ ആവശ്യമുണ്ട്. പാർട്ടി തലത്തിലും സർക്കാർ തലത്തിലും. കോടിയേരി ബാലകൃഷ്ണനും പിണറായി വിജയനും മൗനം വെടിയണം. സി. പി. എം എത്തി നിൽക്കുന്ന അപചയത്തിൻറെ ഒടുവിലത്തെ ഉദാഹരണമാണിത്. പാർട്ടി പ്ളിനം അംഗീകരിച്ച നയരേഖ സംസ്ഥാനസെക്രട്ടറിക്കു മാത്രം ബാധകമല്ലാതാവുന്നതെന്തുകൊണ്ട്? സീതാറാം യെച്ചൂരി ഇക്കാര്യത്തിൽ ലഭിച്ച പരാതിയെ സംബന്ധിച്ച് ജനങ്ങളോട് തുറന്നു പറയാൻ തയ്യാറാവണം.കോടിയേരിയുടെ വിദേശയാത്രകൾ അന്വേഷണപരിധിയിൽ കൊണ്ടുവരണം.