തുള്ളല്‍ കലാകാരന്‍ കലാമണ്ഡലം ഗീതാനന്ദന്‍ വേദിയില്‍ കുഴഞ്ഞുവീണ്‌ മരിച്ചു

പ്രശസ്‌ത തുള്ളല്‍ കലാകാരനും നടനുമായ കലാമണ്ഡലം ഗീതാനന്ദന്‍ (58) ഓട്ടന്‍തുള്ളല്‍ വേദിയില്‍ കുഴഞ്ഞുവീണ്‌ മരിച്ചു. അവിട്ടത്തൂര്‍ മഹാദേവക്ഷേത്രത്തില്‍ പള്ളിവേട്ട ദിനമായിരുന്ന ഇന്നലെ ഓട്ടന്‍തുള്ളല്‍ അവതരിപ്പിക്കുന്നതിനിടെ രാത്രി എട്ടിനായിരുന്നു സംഭവം. സമീപത്തുള്ള പുല്ലൂര്‍ മിഷന്‍ ആശുപത്രിയില്‍ എത്തിച്ചപ്പോഴേക്കും മരണം സംഭവിച്ചിരുന്നു. ഹൃദയാഘാതമാണു മരണകാരണം. കേരള കലാമണ്ഡലത്തില്‍ തുള്ളല്‍ അഭ്യസിച്ച അദ്ദേഹം അവിടെ അധ്യാപകനായും തുള്ളല്‍വിഭാഗം മേധാവിയായും സേവനമനുഷ്‌ഠിച്ചു. വീരശൃംഖലയും തുള്ളല്‍ കലാനിധി പുരസ്‌കാരവും ലഭിച്ചിട്ടുണ്ട്‌. കഥകളിപ്പദക്കച്ചേരിയെ ഓര്‍മിപ്പിക്കുന്ന രീതിയില്‍ ചരിത്രത്തിലാദ്യമായി തുള്ളല്‍പ്പദക്കച്ചേരി അവതരിപ്പിച്ചു. ഓട്ടന്‍തുള്ളലിന്റെ പിതാവ്‌ കുഞ്ചന്‍നമ്പ്യാര്‍ക്കുള്ള ഗാനാഞ്‌ജലിയായിരുന്നു അത്‌. പാരീസില്‍ ആദ്യമായി തുള്ളല്‍ അവതരിപ്പിച്ചത്‌ ഗീതാനന്ദനാണ്‌. ഭാര്യ ശോഭ നൃത്താധ്യാപികയാണ്‌. മക്കള്‍: സനല്‍ കുമാര്‍, ശ്രീലക്ഷ്‌മി. ജ്യേഷ്‌ഠന്‍ കലാമണ്ഡലം വാസുദേവന്‍ മൃദംഗം വിദ്വാന്‍.