കൊടികുത്തി സമരപരിപാടി ഉപേക്ഷിക്കാന്‍ തയ്യാറായി സിപിഐ

കൊടികുത്തി സമരമെന്ന പരിപാടി സിപിഐ ഉപേക്ഷിക്കാന്‍ തയ്യാറാകുന്നു. തീരുമാനത്തിന് തൊട്ടു പിന്നാലെ തിരുവനന്തപുരത്ത് സര്‍ക്കാര്‍ ഭൂമി കയ്യേറിയെന്ന് ആരോപിച്ച് സ്വകാര്യവ്യക്തിയുടെ പറമ്പില്‍ കുത്തിയ കൊടി സിപിഐയും എഐവൈഎഫും എടുത്തുമാറ്റി. പുനലൂരില്‍ വ്യവസായി ആത്മഹത്യ സംഭവം ഉയര്‍ത്തിവിട്ട വിവാദത്തിന്റെ പശ്ചാത്തലത്തില്‍ മുഖ്യമന്ത്രി ഇന്നലെ കൊടികുത്തലിനും നോക്കുകൂലിക്കും എതിരേ രൂക്ഷ വിമര്‍ശനം നടത്തിയിരുന്നു. മെയ് 1 മുതല്‍ നോക്കുകൂലി നിര്‍ത്തലാക്കുകയും ചെയ്തു.

സര്‍ക്കാര്‍ ഭൂമി തിരിച്ചുപിടിക്കാന്‍ സര്‍ക്കാരിന്റെ ഭാഗത്ത് നിന്നു പോലും നടപടി ഇല്ലാത്തപ്പോള്‍ തങ്ങള്‍ തനിച്ച് സമരം ചെയ്യുന്നതില്‍ കാര്യമില്ലെന്ന തിരിച്ചറിവാണ് സിപിഐയെ പിന്നോക്കം അടിച്ചിരിക്കുന്നത്. കഴിഞ്ഞദിവസം തിരുവനന്തപുരം കാലടിയില്‍ സ്വകാര്യ വ്യക്തിയുടെ പറമ്പില്‍ നാട്ടിയ കൊടി പിന്‍ വലിച്ച സിപിഐ ഇത്തരം സമരങ്ങളില്‍ നിന്നും പിന്നോക്കം നീങ്ങാന്‍ കീഴ്ഘടകങ്ങള്‍ക്കും നിര്‍ദേശം നല്‍കിയിട്ടുണ്ട്. ജില്ലയില്‍ അനേകം സര്‍ക്കാര്‍ ഭൂമികളിലും കയ്യേറ്റം നടക്കുന്നുണ്ടെന്നും സര്‍ക്കാരിനില്ലാത്ത വിഷമം തങ്ങള്‍ക്കെന്തിനാണെന്നും അവര്‍ ചോദിക്കുന്നു.

കൊടികുത്തി സമരങ്ങള്‍ക്കെതിരേ മുഖ്യമന്ത്രി കഴിഞ്ഞ ദിവസം നിയമസഭയില്‍ ശക്തമായ നിലപാട് എടുത്തിരുന്നു. മെയ്യനങ്ങാതെ കൂലി വാങ്ങുന്ന തൊഴിലാളി സംഘടനകള്‍ക്കും വ്യക്തികള്‍ക്കുമെതിരേ കര്‍ശന നടപടിയാണ് സര്‍ക്കാര്‍ പ്രഖ്യാപിച്ചത്. മുഖ്യമന്ത്രി പിണറായി വിജയന്റെ അധ്യക്ഷതയില്‍ ഇന്നലെ നടന്ന ട്രേഡ് യൂണിയനുകളുടെ യോഗത്തില്‍ മേയ് ഒന്നുമുതല്‍ സംസ്ഥാനത്ത് നോക്കുകൂലി അവസാനിപ്പിക്കാന്‍ സര്‍ക്കാര്‍ തീരുമാനിച്ചു.