സൗദിയില്‍ സ്ത്രീകള്‍ക്ക് ഇനി പര്‍ദ്ദ നിര്‍ബ്ബന്ധമല്ല; മാന്യതയും അന്തസ്സും നില നിര്‍ത്തുന്ന ഏതു വേഷവുമാകാമെന്ന് സല്‍മാന്‍ രാജകുമാരന്‍

സൗദി സ്ത്രീകള്‍ക്ക് ഇനി പര്‍ദ്ദ ധരിക്കേണ്ടതില്ലെന്നും പകരം മാന്യതയും ആദരവും നില നിര്‍ത്തുന്ന തരം വസ്ത്രങ്ങള്‍ ധരിച്ചാല്‍ മതിയെന്നു അധികാരത്തിലേക്ക് വരുന്ന മുഹമ്മദ് ബിന്‍ സല്‍മാന്‍ രാജകുമാരന്‍. സൗദിയുടെ ഭരണാധികാരിയായി ആദ്യ അമേരിക്കന്‍ സന്ദര്‍ശനത്തിനെത്തിയ അദ്ദേഹം ഒരു ടെലിവിഷന്‍ ചാനലിന് നല്‍കിയ അഭിമുഖത്തിലാണ് ഇക്കാര്യം വ്യക്തമാക്കിയത്.

രാജ്യത്തെ ആധുനികതയിലേക്കു നയിക്കുന്ന തരത്തില്‍ അധികാരമേല്‍ക്കുമ്പോള്‍ കടുത്ത യാഥാസ്ഥിതിക പാരമ്പര്യത്തിന് അയവ് വരുത്തുമെന്നതിന്റെ സൂചന വ്യക്തമാക്കിയ രാജകുമാരന്‍ പക്ഷേ ഇസ്‌ളാമിക സ്ത്രീകള്‍ക്ക് ഇപ്പോഴും സൗദിയില്‍ പൂര്‍ണ്ണ സ്വാതന്ത്ര്യമില്ലെന്നും അവകാശങ്ങള്‍ പൂര്‍ണ്ണമായും അംഗീകരിച്ച് കിട്ടിയിട്ടില്ല എന്നും വ്യക്തമാക്കി. സൗദിയില്‍ വ്യവസ്ഥ ചെയ്യപ്പെട്ടിരിക്കുന്നത് ശരിയത്ത് നിയമമാണ്. അതില്‍ സ്ത്രീകളും പുരുഷന്മാരെപ്പോലെ മാന്യവും ആദരവും കലര്‍ന്ന വസ്ത്രധാരണ രീതിയാണ് ആവശ്യപ്പെടുന്നത്. എന്നാല്‍ അത് കറുത്ത കുപ്പായമോ തലമൂടുന്ന കറുത്ത ദുപ്പട്ടയോ ആയിരിക്കണമെന്ന് പ്രത്യേകിച്ച് പറയുന്നില്ല. മാന്യവും ആദരവുളവാക്കുന്നതുമായ തരം ഏത് വേഷവും സ്ത്രീകള്‍ക്ക് ധരിക്കാമെന്നാണ് വിവക്ഷിക്കുന്നതെന്ന് രാജകുമാരന്‍ പറഞ്ഞു.