ഒരു സീറ്റ് പിടിക്കാന്‍ ആര്‍എസ്എസ് മല്‍സരിക്കാന്‍ തുഷാര്‍

     

സുകുമാരന്‍ നായരുടെ പിന്‍തുണ ഉറപ്പാക്കി

ആലപ്പുഴ : ലോക്‌സഭാ തിരഞ്ഞെടുപ്പില്‍ പിന്നോക്ക വോട്ട് ഉറപ്പിച്ച് വിജയം നേടാന്‍ ആര്‍ എസ് എസ് നേതൃത്വം . ഇതിനായി ബി ഡി ജെ എസ് നേതാവ് തുഷാര്‍ വെള്ളാപ്പള്ളിയെ മതല്‍സര രംഗത്ത് ഇറക്കാന്‍ ആര്‍എസ്എസ് ബി ജെ പി കേന്ദ്രനേതൃത്വത്തോട് ആവശ്യപ്പെട്ടു.   ഡല്‍ഹിയില്‍ വച്ച് തുഷാര്‍ വെള്ളാപ്പള്ളിയുമായും ഇവര്‍ ചര്‍ച്ച നടത്തി. തുഷാര്‍ മല്‍സരിക്കുന്ന മണ്ഡത്തില്‍ എന്‍ എന്‍ എസ് നേതൃത്വം ഒപ്പം നില്‍ക്കുമെന്ന ഉറപ്പ് സുകുമാരന്‍ നായരില്‍ നിന്ന് ആര്‍ എസ് എസ് കേരളചുമതലയുള്ള ലള്‍ നേടിക്കഴിഞ്ഞു. നരേന്ദ്രമോദി ആന്തമാന്‍ സന്ദര്‍ശനം നടത്തിയപ്പോള്‍ ഒപ്പം പോയ ഇദ്ദേഹം കേരളത്തിലെ സംഘടനയുടെ വ്യക്തമായ റിപ്പോര്‍ട്ട് നല്‍കിയിട്ടുണ്ട്. മിക്ക തിരഞ്ഞെടുപ്പുകളിലും ബി.ജെ.പിയില്‍ നിന്ന് മത്സരിക്കുന്ന സ്ഥിരം മുഖങ്ങളില്‍ പലരും വേണ്ടെന്നാണ് ആര്‍.എസ്.എസ് നിര്‍ദേശം. ബി ജെ പി നേതാക്കള്‍ നോട്ടമിട്ടിരിക്കുന്ന തൃശൂര്‍, സി പി എം ഷുവര്‍ സീറ്റായി കണക്കാക്കുന്ന ആറ്റിങ്ങല്‍ എന്നിവിടങ്ങളിലാണ് തുഷാറിനെ സംഘം പരിഗണിക്കുന്നത്. ബി.ജെ.പിയുടെ താഴെത്തട്ടിലുള്ള സംഘടനാ ദൗര്‍ബല്യം ലോക്‌സഭാ തിരഞ്ഞെടുപ്പില്‍ ഇത്തരം സീറ്റുകളില്‍ ബാധിക്കാതിരിക്കാനും വിജയം ഉറപ്പാക്കാനും പ്രചാരണ പ്രവര്‍ത്തനങ്ങള്‍ ഉള്‍പ്പെടെ ആര്‍.എസ്.എസ് നേരിട്ട് ഏറ്റെടുക്കും. തിരഞ്ഞെടുപ്പില്‍ ബൂത്ത് തലം വരെയുള്ള പ്രവര്‍ത്തനം ആര്‍.എസ്.എസ് നിയന്ത്രണത്തിലായിരിക്കും.   കേരളത്തില്‍ പല ബൂത്തുകളിലും ബി.ജെ.പി പ്രവര്‍ത്തനം സജീവമല്ലെന്ന തിരിച്ചറിവിലാണ് ആര്‍.എസ്.എസ് നീക്കം. നിര്‍ണായക തിരഞ്ഞെടുപ്പായതിനാല്‍ കേരളത്തില്‍ നിന്ന് സീറ്റ് ഉറപ്പാക്കുകയാണ് ലക്ഷ്യം. ഇതിന്റെ സൂചന ബി.ജെ.പി നേതൃത്വത്തിന് നല്‍കി. ശബരിമല പ്രക്ഷോഭ സമയത്തും ബി.ജെ.പി കീഴ് ഘടകങ്ങള്‍ സജീവമായിരുന്നില്ല. സാധാരണക്കാരുടെ ഇടയിലിറങ്ങി യുവതീ പ്രവേശനത്തിനെതിരായി ഒപ്പുശേഖരിക്കണമെന്ന് ബി.ജെ.പി തീരുമാനിച്ചിരുന്നെങ്കിലും സംഘടനാപരമായ ദൗര്‍ബല്യം കാരണം കഴിഞ്ഞിരുന്നില്ല.   സാധാരണ തിരഞ്ഞെടുപ്പ് പ്രവര്‍ത്തനത്തിന്റെ അവസാന ഘട്ടത്തില്‍ മാത്രമാകും ബി.ജെ.പി സ്ഥാനാര്‍ത്ഥികള്‍ക്കായി വോട്ട് പിടിക്കാന്‍ ആര്‍.എസ്.എസ് ഇറങ്ങുക. അതിന് മാറ്റം വരുത്തിയാണ്  ഓരോ ലോക്‌സഭാ മണ്ഡലത്തിലും സംസ്ഥാന തലത്തില്‍ പ്രവര്‍ത്തിക്കുന്ന ആര്‍.എസ്.എസ് പരിവാര്‍ നേതാക്കള്‍ക്ക് ചുമതല നല്‍കി.   ജനങ്ങളിലേക്ക് കൂടുതലായി ഇറങ്ങിച്ചെല്ലാന്‍ സജീവമായി രംഗത്തില്ലാത്ത മുതിര്‍ന്ന പ്രവര്‍ത്തകരെക്കൂടി ഉള്‍പ്പെടുത്താനും ആര്‍.എസ്.എസ് തീരുമാനമുണ്ട്. ഇതിനായി സംസ്ഥാനത്തിന്റെ വിവിധ ഭാഗങ്ങളില്‍ പ്രൗഢ ശാഖകള്‍ സജീവമാക്കി.