അടിമൂത്ത് കോണ്‍ഗ്രസ് അടിതെറ്റി നേതാക്കള്‍

  സിദ്ധിക്കിന്റെ പേരില്‍ കോഴിക്കോട്ട് നടന്ന ഗ്രൂപ്പ് യോഗത്തിന്റെ വിവരങ്ങള്‍ പുറത്തുവന്നതോടെ വടക്കന്‍ കേരളത്തിലെ കോണ്‍ഗ്രസ് നേതാക്കള്‍ ആധിയിലായി. തങ്ങളെ നേര്‍ച്ചക്കോഴികളാക്കി നേതാക്കള്‍ ഗ്രൂപ്പ് യുദ്ധം മുറുക്കയാണെന്നാണ് സിദ്ധിക്കും, രാജ് മോഹന്‍ ഉണ്ണിത്താനുമടക്കമുള്ള നേതാക്കള്‍ പറയുന്നത്. കോണ്‍ഗ്രസിന് കിട്ടിയ 12 സീറ്റില്‍ ആറുവീതം എ, ഐ ഗ്രൂപ്പുകള്‍ പങ്കിട്ടു. ബാക്കിയുള്ള നാലെണ്ണം കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ അടക്കമുള്ള മുതിര്‍ന്ന നേതാക്കളോട് കൂറുപുലര്‍ത്തുന്നവര്‍ക്കും നല്‍കി. ഇതാണ് നിലവിലെ പ്രശ്‌നം. കോണ്‍ഗ്രസിലെ ഗ്രൂപ്പ് സമവാക്യം മാറ്റിമറിക്കുന്നതാണ് ഇപ്പോള്‍ പുറത്തുവന്ന പട്ടിക. സാധ്യതാ പട്ടികയില്‍ ഉള്‍പ്പെട്ടവരും അല്ലാത്തവരുമായ നിരവധിപേര്‍ സീറ്റ് മോഹിച്ച് ഡല്‍ഹിയിലും മറ്റും തമ്പടിച്ച് ശ്രമിച്ചെങ്കിലും അന്തിമപരിഗണന ഗ്രൂപ്പ് അടിസ്ഥാനത്തിലായതിനാല്‍ അവരെല്ലാം മടങ്ങി. ഇവരുടെ അമര്‍ഷം വരുംനാളുകളില്‍ ആളിക്കത്തും. മുന്‍ എംപിമാരായ പി ജെ കുര്യന്‍, പി സി ചാക്കോ, കെ പി ധനപാലന്‍, എ പി അബ്ദുള്ളക്കുട്ടി, സീറ്റിനുവേണ്ടി പിടിമുറുക്കിയ ആലപ്പുഴ, മലപ്പുറം ഡിസിസി പ്രസിഡന്റുമാര്‍, വനിതാ നേതാക്കളായ കെ സി റോസക്കുട്ടി, ലതിക സുഭാഷ് എന്നിവരെല്ലാം നേതൃത്വത്തിനെതിരെ അന്തിമപ്പോരാട്ടത്തിന് തയ്യാറെടുക്കുന്നതായാണ് . വടകരയിലെ ജനവിധി എന്തായാലും കടുത്ത ഭീഷണിയായി കെ മുരളീധരനെ കേരള രാഷ്ട്രീയത്തില്‍ നിറയ്ക്കും. മുല്ലപ്പള്ളിയും കെ സി വേണുഗോപാലും സുധീരനും അടക്കം തലമുതിര്‍ന്ന നേതാക്കള്‍ മത്സരിക്കാനില്ലെന്ന് കടുത്ത നിലപാട് സ്വീകരിച്ചപ്പോള്‍ കെ മുരളീധരന്‍ സന്നദ്ധനായത് ഈ സാധ്യതകൂടി കണക്കിലെടുത്താണ്. മുരളിയുടെ ഗ്രൂപ്പ് ഒറ്റരാത്രികൊണ്ട് പതിനാല് ജില്ലകളിലും വീണ്ടും സജീവമായി എന്നതാണ് നിലവിലെ സ്ഥിതി.