ചെഗുവേരയുടെ ജന്മഗൃഹം വില്‍പനയ്ക്ക്

  കമ്മ്യൂണിസ്റ്റ് വിപ്ലവ നായകന്‍ ഏണസ്റ്റോ ചെഗുവേരയുടെ ജന്മഗൃഹം വില്‍പനയ്ക്ക്. അര്‍ജന്റീനയിലെ റൊസാരിയോയിലെ വീടാണ് നിലവിലെ ഉടമസ്ഥനായ ഫ്രാന്‍സിസ്‌കോ ഫറൂഗിയ വില്‍ക്കുന്നത്. 2002ലാണ് 2580 ചതുരശ്ര അടി വിസ്തീര്‍ണമുള്ള ഈ വീട് ഫറൂഗിയ വാങ്ങുന്നത്. ഈ വീട് സാംസ്‌കാരിക കേന്ദ്രമാക്കുക എന്ന ഉദ്ദേശത്തോടെയാണ് ഫറൂഗിയ വീട് 2002ല്‍ വാങ്ങിയത്. എന്നാല്‍ അത് നടന്നില്ല. എത്ര വിലയ്ക്കാണ് വീടു വില്‍ക്കാനുദ്ദേശിക്കുന്നതെന്ന് ഇദ്ദേഹം ഇതുവരെയും വെളിപ്പെടുത്തിയിട്ടില്ല. ഈ കാലത്തിനിടയില്‍ പ്രമുഖരായ ഒരുപാട് സന്ദര്‍ശകര്‍ ഉര്‍ക്വിസ തെരുവിനും എന്‍ട്രെ റയോസിനും ഇടയിലുള്ള ഈ വീട് കാണാന്‍ എത്തിയിട്ടുണ്ട്. ഉറുഗ്വെ മുന്‍ പ്രസിഡന്റ് ജോസ് പെപെ മ്യൂജിക്ക, ഫിഡല്‍ കാസ്ട്രോയുടെ മക്കള്‍ തുടങ്ങിയവരും ഇവിടം സന്ദര്‍ശിച്ചിട്ടുണ്ട്. സന്ദര്‍ശകരില്‍ ഏറ്റവും പ്രമുഖന്‍ തെക്കേ അമേരിക്കയിലൂടെ ചെഗുവേര 1950കളില്‍ നടത്തിയ മോട്ടോര്‍സൈക്കിള്‍ യാത്രകളില്‍ ഒപ്പമുണ്ടായിരുന്ന ആല്‍ബര്‍ട്ടോ ഗ്രനഡോസായിരുന്നു. സാമ്പത്തികമായി മോശമല്ലാത്ത 1928 ഒരു മധ്യവര്‍ത്തി കുടുംബത്തിലാണ് ചെഗുവേര ജനിച്ചത്. എന്നാല്‍ പിന്നീട് തെക്കന്‍ അമേരിക്കയിലെ ദാരിദ്ര്യവും പട്ടിണിയുമൊക്കെ അനുഭവിച്ചറിഞ്ഞത് ചെഗുവേരയെ മറ്റൊരു വഴിയിലേക്ക് തിരിച്ചുവിട്ടു. 1953-59 കാലഘട്ടത്തില്‍ നടന്ന ക്യൂബന്‍ വിപ്ലവത്തില്‍ ചെഗുവേര പ്രധാന പങ്കുവഹിച്ചു.