രണ്ടു കല്‍പ്പിച്ച് ജോസഫ്

നിലയില്ലാകയത്തില്‍ ജോസ്

എതിര്‍ത്ത് നിന്ന് മുന്നണി വിടണം, അല്ലങ്കില്‍ എല്ലാം അവസാനിപ്പിച്ച് കീഴടങ്ങണം.  അരനൂറ്റുകാലം കേരള രാഷ്ട്രീയത്തെ സ്വന്തം കീശയിലാക്കി കളിച്ച രാഷ്ട്രീയ നേതാവിന്റെ മകനുമുന്നില്‍ ഈ രണ്ടു വഴിമാത്രം.

കോട്ടയം , ഇടുക്കി, പത്തനംതിട്ട ജില്ലകളിലെ കോണ്‍ഗ്രസ് നേതാക്കളുടെ പിന്‍തുണയും, ബെന്നിബഹനാനും, രമേശ് ചെന്നിത്തലയും കൂടി പി ജെ ജോസഫിന് പിന്നില്‍ അണിനിരന്നതോടെ നിലയില്ലാ കയത്തില്‍ ആയിരിക്കുകയാണ് ജോസ് കെ മാണി. കോട്ടയം ജില്ലാ പഞ്ചായത്തില്‍ ജോസ് വിഭാഗക്കാരനായ പ്രസിഡന്റിനെ പുറത്താക്കാന്‍ കോണ്‍ഗ്രസിന്റെ പിന്തുണ ലഭിച്ചതായി പി ജെ ജോസഫ് മാധ്യമങ്ങളോടു പറഞ്ഞു കഴിഞ്ഞു. രാജിവയ്ക്കാനുള്ള അന്ത്യശാസനം തള്ളിയതിനാല്‍ ജില്ലാ പഞ്ചായത്തില്‍ അവിശ്വാസ പ്രമേയം കൊണ്ടുവരും. കോണ്‍ഗ്രസിനൊപ്പം മുസ്ലിംലീഗും പിന്തുണയ്ക്കുമെന്ന് ജോസഫ് ചങ്ങനാശേരിയിലാണ് മാധ്യമപ്രവര്‍ത്തകരോട് പറഞ്ഞത്. ഇനി തീരുമാനം എടുക്കാതിരിക്കാന്‍ ജോസ് കെ മാണിക്ക് കഴിയാത്ത സ്ഥിതിയാണ്. യുഡിഎഫിലെ ഘടകകക്ഷികള്‍ മുഴുവനും കോണ്‍ഗ്രസ് പ്രത്യേകമായും നടത്തിയ എല്ലാ അനുരഞ്ജന ശ്രമവും പാളിയതോടെയാണ് ജോസഫ് അവിശ്വാസത്തിലേക്ക് നീങ്ങുന്നത്. ജില്ലാ പഞ്ചായത്തില്‍ രണ്ട് അംഗങ്ങള്‍ മാത്രമുള്ളതിനാല്‍ ജോസഫ് ഗ്രൂപ്പിന് അവിശ്വാസം കൊണ്ടുവരാന്‍ കഴിയില്ല. എന്നാല്‍ കോണ്‍ഗ്രസിന്റെ എട്ടംഗങ്ങളുടെ പിന്തുണ ലഭിച്ചാല്‍ പറ്റും. ആദ്യം ജോസഫിനെ പിന്തുണച്ചും പിന്നെ രണ്ടിടത്തും ചേരാതെയും ആടിക്കളിച്ച കോണ്‍ഗ്രസിനെ ഒപ്പം നിര്‍ത്താനായിരുന്നു ഇതുവരെ ജോസഫിന്റെ ശ്രമം. ഇത് വിജയിച്ചുവെന്നാണ് അദ്ദേഹത്തിന്റെ പ്രതികരണം വ്യക്തമാക്കുന്നത്. ജില്ലാപഞ്ചായത്തില്‍ ആകെ 22 അംഗങ്ങളാണുള്ളത്. ജോസ് പക്ഷത്ത് നാലും ജോസഫിന് രണ്ടും അംഗങ്ങള്‍. കോണ്‍ഗ്രസിന് എട്ട് പേര്‍. ജനപക്ഷത്തിന് ഒരാളുണ്ട്. സിപിഐ എം ആറ്, സിപിഐ ഒന്ന് എന്നിങ്ങനെയാണ് ഇടതുമുന്നണിയുടെ കക്ഷിനില.