മത്സ്യമേഖലയില്‍ സംഘര്‍ഷത്തിന് നീക്കം

ഫറോക്ക് ചാലിയത്ത് ഫിഷ് ലാന്‍ഡിങ് സെന്ററിലെ പ്രശ്‌നങ്ങളുടെ പേരില്‍ രാഷ്ട്രീയ മുതലെടുപ്പിന് ഗൂഢശ്രമം. മറ്റിടങ്ങളിലേക്ക് ഇത് പടരാതിരിക്കാന്‍ പൊലീസ് രംഗത്തുണ്ട്. സംഘര്‍ഷം സൃഷിക്കുന്നവര്‍ക്കെതിരെ പൊലീസ് രംഗത്തെത്തി. മത്സ്യമേഖലയില്‍ ഇരു വിഭാഗങ്ങള്‍ തമ്മിലുള്ള അഭിപ്രായ വ്യത്യാസങ്ങള്‍ ഊതിവീര്‍പ്പിച്ച് സംഘര്‍ഷത്തിലെത്തിച്ച് തീരമേഖലയിലെ ജനങ്ങളുടെ തൊഴിലും വരുമാനമാര്‍ഗവും മുടക്കിയുള്ള രാഷ്ട്രീയ നേട്ടമാണ് ഒരുവിഭാഗം ലക്ഷ്യമിടുന്നത്. പഞ്ചായത്ത് ഓഫീസില്‍ ചേര്‍ന്ന യോഗത്തിലെടുത്ത തീരുമാനങ്ങളും കടല്‍ക്കോടതിയെന്ന പേരില്‍ ഒരു വിഭാഗം ഉന്നയിക്കുന്ന കാര്യങ്ങളും ഏറെയും സമാനമാണ്. ഞായറാഴ്ച സമ്പൂര്‍ണ അടച്ചിടലില്‍ മാത്രമാണ് ഭിന്നാഭിപ്രായമുള്ളത്. അതേസമയം ഔദ്യോഗിക തീരുമാനങ്ങള്‍ക്കെതിരെ അഭിപ്രായമുയര്‍ത്തി മത്സ്യമേഖലയിലുള്ളവരെ ചേരിതിരിക്കാനാണ് രാഷ്ട്രീയ താല്‍പ്പര്യമുള്ളവര്‍ ശ്രമിക്കുന്നത്. തദ്ദേശ തെരഞ്ഞെടുപ്പ് കണ്ടാണ് ഇവരുടെ നീക്കം. പൊലീസും ജില്ലാ ഭരണകേന്ദ്രവും നടത്തിയ അവസരോചിത ഇടപെടലാണ് നടത്തിയിരിക്കുന്നത്. പൊലീസ് മത്സ്യത്തൊഴിലാളികളെ തല്ലിച്ചതച്ചതായി ആരോപിച്ച് തിങ്കളാഴ്ച രാവിലെ ആറു മുതല്‍ വൈകിട്ട് ആറുവരെ ചാലിയം തീരമേഖലയില്‍ കടുക്കബസാര്‍ മുതല്‍ ഫിഷ് ലാന്‍ഡിങ് സെന്റര്‍വരെ ഹര്‍ത്താലാചരിക്കുമെന്ന് ചാലിയം മത്സ്യത്തൊഴിലാളികള്‍ കടല്‍കോടതിയെ അറിയിച്ചിട്ടുണ്ട്. തൈക്കടപ്പുറത്ത് സിദ്ദീഖ്(45), കൈതവളപ്പില്‍ സലിം (30), കെ വി ജൈസല്‍ (38), വടക്കകത്ത് അലിമോന്‍ (35), ഷാഫി ചെറിയകത്ത്(48), തൈക്കടപ്പുറത്ത് സൈതലവി (30) എന്നിവര്‍ക്ക് മര്‍ദനമേറ്റതായാണ് പരാതി. ഇവര്‍ ഫറോക്ക് താലൂക്കാശുപത്രിയില്‍ ചികിത്സ തേടി. സമാധാനാന്തരീക്ഷം നിലനിര്‍ത്താന്‍ എല്ലാവരുമായും ആലോചിച്ച് ആവശ്യമായ നടപടി സ്വീകരിക്കുമെന്ന് സ്ഥലത്തെത്തിയ ഫിഷറീസ് ഡെപ്യൂട്ടി ഡയറക്ടര്‍ സുധീര്‍ കിഷന്‍ അറിയിച്ചു. പൊലീസ് സ്ഥലത്ത് ക്യാമ്പ് ചെയ്യുന്നുണ്ട്.