സ്വര്‍ണകടത്ത് : പിന്നില്‍ കൊടുവള്ളിയിലെ വമ്പന്‍

കൊച്ചി : തിരുവനന്തപുരം എയര്‍ പോര്‍ട്ട് കേന്ദ്രീകരിച്ച് നടത്തിയ സ്വര്‍ണകടത്തിലെ പ്രധാനി കൊടുവള്ളിസ്വദേശിയാണന്ന് സൂചന. ഇത് സംബന്ധിച്ച് കേസ് അന്വേഷിക്കുന്ന കസ്റ്റംസ് സംഘത്തിന് വിവരങ്ങള്‍ ലഭിച്ചതായിട്ടാണ് പുറത്തുവന്നിരിക്കുന്നത്. കഴിഞ്ഞ ദിവസങ്ങളില്‍ സ്വപ്‌ന സുരേഷ് താമസിക്കുന്ന തിരുവനന്തപുരത്തെ വസതിയില്‍ നടത്തിയ പരിശോധനയിലാണ് ഇത് സംബന്ധിച്ച വിവരങ്ങള്‍ലഭിച്ചത്. തിരുവനന്തപുരം സ്വദേശികളും യുഎഇ കോണ്‍സുലേറ്റ് മുന്‍ ജീവനക്കാരുമായ സരിത്തിനും സ്വപ്നയ്ക്കും പുറമേ മൂന്നുപേര്‍ കൂടിയുള്ളതായ നിര്‍ണായക വിവരം കസ്റ്റംസിന് ലഭിച്ചു. കോഴിക്കോട് കൊടുവള്ളിയിലുള്ള വ്യക്തിയാണ് സംഘത്തിലെ മുഖ്യകണ്ണി. സ്വര്‍ണം കടത്താനുള്ള ആസൂത്രണങ്ങളുടെ ചുക്കാന്‍ പിടിക്കുന്നത് സരിത്തും ഇയാളുമാണ്. സ്വര്‍ണം ഇറക്കാനുള്ള തുകയില്‍ ഏറിയ പങ്കും മുടക്കുന്നത് ഇയാളാണ്. ഒരു കടത്തലിന് 25 ലക്ഷം രൂപവരെ ഇടനിലക്കാര്‍ക്ക് ലഭിക്കും. സ്വപ്നയുടെ വീട്ടില്‍ നടത്തിയ തെരച്ചിലിലാണ് കൊടുവള്ളി സ്വദേശിയെക്കുറിച്ച് തെളിവ് ലഭിച്ചത്. ഈ തെളിവുകള്‍ നിരത്തിയുള്ള ചോദ്യം ചെയ്യലില്‍ സരിത്ത് മറ്റ് രണ്ടുപേരുകള്‍ കൂടി വെളിപ്പെടുത്തി. സംഘത്തില്‍ വേറെയും ആള്‍ക്കാരുണ്ടോയെന്നും കസ്റ്റംസ് പരിശോധിക്കുന്നു. കോവിഡ് കാലത്തുമാത്രം മൂന്നുതവണ സംഘം സ്വര്‍ണം കടത്തി. ഈ സ്വര്‍ണവും കോഴിക്കോട്ട് എത്തിച്ചു.