സമ്പര്‍ക്ക് രോഗികള്‍ കൂടുന്നു ക്വാറന്റൈന്‍ പൊലീസിലേക്ക്

    ആശങ്കയുണര്‍ത്തി സമ്പര്‍ക്കത്തിലൂടെ രോഗം ബാധിച്ചവരുടെയും പ്രതിദിന രോഗികളുടെയും ഏറ്റവും ഉയര്‍ന്ന നിരക്കില്‍ എത്തിയതോടെ ആരോഗ്യവകുപ്പിനൊപ്പം പൊലീസും രംഗത്തേക്ക്.. ചൊവ്വാഴ്ച രോഗം സ്ഥിരീകരിച്ചതില്‍ 68 പേര്‍ക്കും സമ്പര്‍ക്കത്തിലൂടെയാണ് രോഗം ബാധിച്ചത്. ഇതില്‍ 15 പേരുടെ ഉറവിടം കണ്ടെത്താനായിട്ടില്ല. ഇതുവരെയുള്ളതില്‍ ഏറ്റവും കൂടിയ രോഗികളുടെ എണ്ണമാണ് ചൊവ്വാഴ്ചയുണ്ടായത്. ഉറവിടം അറിയാത്ത രോഗബാധ കൂടുന്നതാണ് നിരീക്ഷണം കര്‍ശനം ആക്കാനുള്ള തീരുമാനത്തിന് പിന്നില്‍ . സാധാരണയില്‍നിന്ന് വ്യത്യസ്തമായ സ്ഥിതിയിലേക്ക് കാര്യങ്ങള്‍ നീങ്ങുന്നുവെന്ന സൂചനയാണിതെന്നാണ് വിലയിരുത്തല്‍. ചില മേഖലകളില്‍ അയവ് വന്നതിന്റെ പ്രതിഫലനം കണക്കുകളിലുണ്ട്. ചെറിയ അശ്രദ്ധ പോലും ഏത് നിമിഷവും സൂപ്പര്‍ സ്പ്രെഡിനും സാമൂഹ്യവ്യാപനത്തിനും കാരണമായേക്കാം. നിയന്ത്രണങ്ങള്‍ വിട്ടുവീഴ്ചയില്ലാതെ പാലിക്കണം. അശ്രദ്ധ സ്വന്തം ജീവന്‍ മാത്രമല്ല, പ്രിയപ്പെട്ടവരുടെ ജീവന്‍ കൂടിയാണ് അപകടത്തിലാക്കുകയെന്ന ഓര്‍മ വേണം. മികച്ച രീതിയില്‍ ഇതുവരെ രോഗത്തെ ചെറുത്ത് നിര്‍ത്താനായി. ജനസാന്ദ്രത കൂടിയ നഗരങ്ങളില്‍ എളുപ്പത്തില്‍ രോഗം പടരും. രാജ്യത്തിന്റെയാകെ അനുഭവം ഇതാണ്. നഗരങ്ങളിലേക്ക് കച്ചവടത്തിനും മറ്റും വരുന്നവരിലൂടെ ഗ്രാമങ്ങളിലേക്കും രോഗം എത്തും (സെന്‍ട്രി പെറ്റല്‍ ഇഫക്ട്). സംസ്ഥാനത്തിന്റെ ജനസാന്ദ്രത കണക്കിലെടുത്ത് ഇതിന് സാധ്യത കൂടുതലാണ്. ക്വാറന്റൈന്‍ ഉറപ്പാക്കാന്‍ മിന്നല്‍ പരിശോധന സംസ്ഥാനത്തേക്ക് മടങ്ങിയെത്തുന്നവര്‍ വീടുകളില്‍ നിരീക്ഷണത്തില്‍ കഴിയുന്നുണ്ടെന്ന് ഉറപ്പാക്കാന്‍ ജില്ലയിലെ മുതിര്‍ന്ന പൊലീസ് ഉദ്യോഗസ്ഥര്‍ മിന്നല്‍ സന്ദര്‍ശനം നടത്തും. ക്വാറന്റൈന്‍ ലംഘിച്ച 13 പേര്‍ക്കെതിരെ ചൊവ്വാഴ്ച കേസ് രജിസ്റ്റര്‍ ചെയ്തു. മാസ്‌ക് ധരിക്കാത്ത 4817 സംഭവങ്ങളും റിപ്പോര്‍ട്ട് ചെയ്തു. തിരിച്ചെത്തുന്ന അതിഥി തൊഴിലാളികള്‍ നിര്‍ബന്ധമായും 14 ദിവസം നിരീക്ഷണത്തില്‍ കഴിയണം. കരാറുകാരും ഏജന്റുമാരും ഇത് ഉറപ്പാക്കണം.ക്രിമിനല്‍ കേസില്‍ കുറ്റാരോപിതരാകുന്നവര്‍ക്ക് കോവിഡ് പരിശോധനാഫലം 48 മണിക്കൂറിനകം ലഭ്യമാക്കണമെന്ന് നിര്‍ദേശം നല്‍കി കഴിഞ്ഞു. തിരുവനന്തപുരത്താണ് ചൊവ്വാഴ്ച ഏറ്റവും കൂടുതല്‍ സമ്പര്‍ക്ക രോഗികള്‍. നഗരത്തിനകത്തും പുറത്തുമായി- 42 പേര്‍. തിരുവനന്തപുരത്ത് സംഭവിച്ചത് മറ്റ് നഗരങ്ങളില്‍ സംഭവിച്ചുകൂടാ. നഗരങ്ങളില്‍ നിയന്ത്രണം ശക്തമാക്കും. കൊച്ചിയിലെ ടെസ്റ്റ് പോസിറ്റിവിറ്റി റേറ്റ് സംസ്ഥാന ശരാശരിക്ക് മുകളിലാണ്. ഇത് ആശങ്ക സൃഷ്ടിക്കുന്നതാണ്. അവിടെ ടെസ്റ്റുകളുടെ എണ്ണം കൂട്ടും. സൈനിക-- അര്‍ധസൈനികര്‍ക്കിടയിലെ രോഗവ്യാപനവും ആശങ്ക ഉളവാക്കുന്നതാണ് അതിനാണ് പുതിയ തലത്തിലേക്ക് പരിശോധനകളും അന്വേഷണവും മാറ്റിയിരിക്കുന്നത്.