രോഗികള്‍ കൂടി മഹാരാഷ്ട്ര

    കൊവിഡ് ബാധിതരുടെ പ്രതിദിന വര്‍ധനയില്‍ ഭീതിയേറി മഹാരാഷ്ട്ര. അവസാന 24 മണിക്കൂറില്‍ 7,862 പേര്‍ക്കാണു സംസ്ഥാനത്ത് രോഗം സ്ഥിരീകരിച്ചത്. വര്‍ധനയിലെ പുതിയ റെക്കോഡ്. 226 പേരുടെ മരണം കൂടി രേഖപ്പെടുത്തി സംസ്ഥാന ആരോഗ്യ മന്ത്രാലയം. അതോടെ മൊത്തം മരണസംഖ്യ 9,893 ആയിട്ടുണ്ട്. മൊത്തം രോഗബാധിതര്‍ 2,38,461 ആയും ഉയര്‍ന്നു. മുംബൈയും പൂനെയും ഇപ്പോഴും നിയന്ത്രണ വിധേയമാവുന്നില്ല എന്നാണ് ആരോഗ്യ വിദഗ്ധര്‍ ചൂണ്ടിക്കാണിക്കുന്നത്. അവസാന 24 മണിക്കൂറില്‍ 1337 കേസുകളാണ് മുംബൈയില്‍ സ്ഥിരീകരിച്ചത്. പൂനെ നഗരത്തില്‍ 1099 കേസുകളും. മുംബൈ നഗരം അടങ്ങുന്ന മെട്രൊപൊളിറ്റന്‍ മേഖല(എംഎംആര്‍)യില്‍ 4,513 കേസുകള്‍ ഒരൊറ്റ ദിവസം കൊണ്ട് കണ്ടെത്തി. എംഎംആറിലെ മൊത്തം രോഗബാധിതര്‍ 1,64,175 ആണ്. മരണം 7,063. അവസാനം റിപ്പോര്‍ട്ട് ചെയ്യപ്പെട്ട 226 മരണങ്ങളില്‍ 145ഉം എംഎംആറിലാണ്. മെട്രൊപൊളിറ്റന്‍ മേഖലയില്‍ രോഗ നിയന്ത്രണം സാധ്യമായാല്‍ തന്നെ സംസ്ഥാനത്തെ മൊത്തം ചിത്രത്തില്‍ അതു വലിയ പുരോഗതിയുണ്ടാക്കും. മുംബൈ നഗരത്തില്‍ മാത്രം രോഗബാധിതര്‍ 90,000 കടന്നിട്ടുണ്ട്. നഗരത്തിലെ മരണസംഖ്യ 5,205. അവസാന 24 മണിക്കൂറില്‍ 73 പേരാണു മുംബൈ നഗരത്തില്‍ മാത്രം കൊവിഡ് ബാധിച്ചു മരിച്ചത്. മെട്രൊപൊളിറ്റന്‍ മേഖലയില്‍ താനെ നഗരവും കല്യാണ്‍ ഡോംബിവലിയും ഇപ്പോള്‍ ഭീഷണിയേറിയ മേഖലകളായിരിക്കുന്നു. 13,837 കേസുകളായി താനെ സിറ്റിയില്‍. 13,192 കേസുകള്‍ ഡോംബിവലിയിലുണ്ട്. ഇവിടെ ഇന്നലെ മാത്രം സ്ഥിരീകരിച്ചത് 694 കേസുകളാണ്. 1.32 ലക്ഷത്തിലേറെ പേര്‍ ഇതുവരെ രോഗമുക്തരായിട്ടുണ്ടെന്നതിലാണ് സംസ്ഥാന ആരോഗ്യ മന്ത്രാലയം അല്‍പ്പം ആശ്വാസം കൊള്ളുന്നത്. 95,943 ആക്റ്റിവ് കേസുകളാണു സംസ്ഥാനത്തുള്ളത്. റിക്കവറി നിരക്ക് 55.62 ശതമാനമാണെന്ന് സംസ്ഥാന ആരോഗ്യ മന്ത്രാലയം ചൂണ്ടിക്കാണിക്കുന്നു.