ലാപ് ടോപ്പിലെ രഹസ്യമെന്ത്

സ്വര്‍ണക്കടത്ത് കേസ് പ്രതി സന്ദീപിന്റെ ബാഗില്‍ നിന്ന് ലഭിച്ച ലാപ്‌ടോപ്പിലെ വിവരങ്ങള്‍ അറിയാനുള്ള ശ്രമത്തിലാണ് എന്‍ ഐ എ സംഘം. പിടിയിലായവരുടെയും ചോദ്യം ചെയ്തവരുടെയും ഫോണുകളും അന്വേഷണ സംഘം ശേഖരിച്ചിട്ടുണ്ട്. മായിച്ചു കളഞ്ഞ വിവരങ്ങള്‍ ലഭ്യമാക്കുന്നതിനുള്ള പരിശോധനകള്‍ ആരംഭിച്ചു കഴിഞ്ഞു. ഇപ്പോള്‍ ലഭിച്ചിരിക്കുന്ന ലാപ്‌ടോപ്പ് നിര്‍ണ്ണായകമായതുകൊണ്ടാണ് പ്രതി അത് കൂടെ കൊണ്ടുപോയതെന്നാണ് നിഗമനം. അതിനാല്‍ ഇതില്‍ നിന്ന് ലഭിക്കുന്ന വിവരങ്ങള്‍ അന്വേഷണത്തിന് കൂടുതല്‍ സഹായകമാവും. സ്വര്‍ണക്കടത്ത് പിടിച്ചദിവസം പ്രതി സ്വപ്ന സുരേഷിന്റെ ഫോണിലേക്ക് യുഎഇ കോണ്‍സുലേറ്റിലെ ഉന്നതന്റെ ഫോണ്‍ വിളിച്ചിരുന്ന വിവരവും പുറത്തുവന്നിട്ടുണ്ട്. വന്‍ ഗൂഡാലോചനയാണ് തെളിഞ്ഞിരിക്കുന്നത്. കോണ്‍സല്‍ ജനറല്‍ ഉപയോഗിക്കുന്ന ഫോണില്‍ നിന്ന് മൂന്നുതവണയാണ് വിളി വന്നത്. തൊട്ടുമുന്‍പുള്ള ദിവസങ്ങളില്‍ യുഎഇ കോണ്‍സുലേറ്റിലെ ഫോണില്‍ നിന്നും വിളിച്ചെന്നും ഫോണ്‍വിളി രേഖകളിലുണ്ട്. അഞ്ചാംതീയതി, അതായത് തിരുവനന്തപുരം വിമാനത്താവളം വഴി കടത്തിയ സ്വര്‍ണം കസ്റ്റംസ് പിടികൂടുന്ന ദിവസം സ്വപ്നയുടെ ഫോണിലേക്ക് വന്ന കോളുകളുടെ വിവരങ്ങളാണ് ഇത്. നയതന്ത്ര കാര്‍ഗോ വഴി സ്വര്‍ണം കടത്തിയെന്ന വാര്‍ത്തപുറത്തുവരുന്നത് പതിനൊന്നരയ്ക്കാണ്. ഇതോടടുപ്പിച്ചുള്ള സമയത്ത് കോണ്‍സുല്‍ ജനററലിന്റെ ഫോണ്‍ നമ്പരില്‍നിന്ന് മൂന്ന് കോളുകളാണ് സ്വപ്നയുടെ ഫോണിലേക്ക് വരുന്നത്. 11.43നും 11.58നും 12.23നുമാണ് ആ കോളുകള്‍. ലഗേജ് തടഞ്ഞതിനെ തുടര്‍ന്ന് കോണ്‍സുല്‍ ജനറല്‍ നിര്‍ദേശിച്ച പ്രകാരമാണ് താന്‍ കസ്റ്റംസിനെ വിളിച്ചതെന്നായിരുന്നു സ്വപ്ന ഹൈക്കോടതിയില്‍ നല്‍കിയ മുന്‍കൂര്‍ ജാമ്യാപേക്ഷയില്‍ പറഞ്ഞിരുന്നത്. അത് ന്യായീകരിക്കുന്നതാണ് ഫോണ്‍ വിളി രേഖകള്‍.