കരിപ്പൂരില്‍ പിടിച്ചിട്ടിരിക്കുന്ന ബാഗുകളില്‍ സ്വര്‍ണം

 

കരിപ്പൂര്‍ വിമാനത്താവളത്തിലെ എയര്‍ കാര്‍ഗോ കോംപ്ലക്‌സില്‍ പരിശോധനകള്‍ കാത്ത് ബാഗേജുകള്‍ കെട്ടിക്കിടക്കുന്നു. യാത്രക്കാരില്ലാതെ ഗള്‍ഫില്‍ നിന്ന് അണ് അക്കബനീഡ് ബാഗേജായി കാര്‍ഗോ വഴി എത്തിച്ച ബാഗേജുകളാണ് മാസങ്ങളായി കാര്‍ഗോയില്‍ കെട്ടിക്കിടക്കുന്നത്. രണ്ടര മാസം മുന്‍പ് ഇതോടൊപ്പം എത്തിയ ചില ബാഗേജുകള്‍ പരിശോധിച്ചപ്പോള്‍ സ്വര്‍ണം കണ്ടെത്തിയിരുന്നു. കസ്റ്റംസ് ഹാളില്‍ എത്തിച്ചായിരുന്നു ബാഗുകള്‍ പരിശോധിച്ചത്. രണ്ടു ബാഗില്‍ നിന്നാണ് സ്വര്‍ണം കണ്ടെത്തിയത്. ഇതോടെയാണ് പരിശോധനകള്‍ നടത്താതെ കാര്‍ഗോ വിട്ടു നല്‍കേണ്ടെന്ന് കസ്റ്റംസ് തീരുമാനിച്ചത്. വ്യവസായ വകുപ്പിനു കീഴില്‍ കേരള സ്റ്റേറ്റ് ഇന്‍സ്ട്രിയല്‍ എന്റര്‍പ്രൈസസിന് (കെഎസ്‌ഐഇ) കീഴിലാണ് കരിപ്പൂര്‍ എയര്‍കാര്‍ഗോ കോംപ്ലസ് പ്രവര്‍ത്തിക്കുന്നത്. ഇവിടെ സ്വര്‍ണമടക്കം ഒളിപ്പിച്ച് കടത്തുന്നത് പരിശോധിക്കാനുള്ള എകസ്‌റെ മെഷിന്‍ തകരാറിലായിട്ട് മാസങ്ങളായി. കോവിഡ് 19നെ തുടര്‍ന്ന് മാര്‍ച്ച് മാസത്തില്‍ ലോക്ക് ഡൗണ്‍ പ്രഖ്യാപിച്ചതിന് പിന്നാലെ വിമാന സര്‍വീസുകള്‍ നിര്‍ത്തിവച്ചിരുന്നു. ഈ സമയം വരെ കാര്‍ഗോയില്‍ ബാഗേജുകള്‍ എത്തിയിട്ടുണ്ട്. എന്നാല്‍ പരിശോധന യന്ത്രം തകരാറിലായതോടെ ബാഗേജുകള്‍ വിട്ടുകൊടുക്കാനായിട്ടില്ല. എക്‌സറേ മെഷിന്‍ തകരാറിലായത് പുനഃസ്ഥാപിക്കുന്നത് സംബന്ധിച്ച തര്‍ക്കം കെഎസ്‌ഐഇയും കസ്റ്റംസും തമ്മിലുണ്ട്. ദേശീയ സുരക്ഷയുമായി ബന്ധപ്പെട്ട വിഷയമായതിനാല്‍ പുതിയ എക്‌സറേ മെഷിന്‍ ഉടന്‍ സ്ഥാപിക്കണമെന്ന് കസ്റ്റംസ് ആവശ്യപ്പെട്ടിട്ട് മാസങ്ങളായി. എന്നാല്‍ മെഷിന്‍ കസ്റ്റംസ് സ്ഥാപിക്കണമെന്ന ആവശ്യമാണ് കാര്‍ഗോ കോംപ്ലക്‌സ് ഉന്നയിക്കുന്നത്. ഇരുവരുടെയും തര്‍ക്കത്തില്‍ ബാഗേജുകള്‍ കിട്ടാതെ കാര്‍ഗോ അയച്ച യാത്രക്കാരും ദുരിതത്തിലാകുന്നു. കഴിഞ്ഞ നവംബറിലാണ് മെഷിന്‍ തകരാറിലായത്. ഇതിനു മുന്പുളള പരിശോധനയിലും, കസ്റ്റംസ് ആസ്ഥാനത്ത് എത്തിച്ച് നടത്തിയ പരിശോധനയിലുമാണ് സ്വര്‍ണക്കടത്ത് കണ്ടെത്തിയിരുന്നത്. ഇതോടെയാണ് കസ്റ്റംസ് നിലപാട് കടുപ്പിച്ചത്. എക്‌സറേ പരിശോധനക്ക് ആവശ്യമായ സാഹചര്യം ഒരുക്കിയിട്ടില്ലെങ്കില്‍ കെഎസ്‌ഐഇയുടെ ലൈസന്‍സ് അടക്കം റദ്ദാക്കുമെന്ന് കസ്റ്റംസ് മുന്നറിയിപ്പ് നല്‍കിയിട്ടുണ്ട്. കഴിഞ്ഞ ജനുവരി മുതലുളള 80 ബാഗേജുകളാണ് കാര്‍ഗോയില്‍ കെട്ടിക്കിടക്കുന്നത്. യാത്രക്കാര്‍ എത്തിച്ച വസ്ത്രങ്ങള്‍, ശീതള പാനീയങ്ങള്‍, മിഠായികള്‍ തുടങ്ങിയവ അടക്കം ഇതിലുണ്ട്. മാസങ്ങളായി കാര്‍ഗോ കെട്ടിടത്തില്‍ കെട്ടിക്കിടക്കുന്ന ഇവ ഉപയോഗയോഗ്യമല്ലാതെയാകുമെന്ന സന്ദേഹം യാത്രക്കാര്‍ക്കുമുണ്ട്. ഗള്‍ഫിലേക്ക് വിമാന സര്‍വീസുകള്‍ ഇല്ലാതായതോടെയാണ് കാര്‍ഗോയില്‍ ചരക്കുകളുടെ വരവ് കുറഞ്ഞത്.സര്‍വീസുകള്‍ ആരംഭിച്ചാല്‍ ബാഗേജുകള്‍ എത്തിക്കൊണ്ടിരിക്കും. ഇതോടെ പരിശോധനകളും പ്രതിസന്ധിയിലാകും.