കേരളത്തില്‍ നിരോധിത നോട്ടുകള്‍ കടത്തിയതും സ്വര്‍ണത്തിന് വേണ്ടി

തിരുവനന്തപുരം സ്വര്‍ണകടത്ത് കേസിലെ പ്രതികള്‍ പണം റിയല്‍ എസ്റ്റേറ്റ് മേഖലയില്‍ നിക്ഷേപിച്ചതായി സൂചന. മലബാര്‍ കേന്ദ്രീകരിച്ച് നടത്തിയ അന്വേഷണമാണ് ഇത്തരം ബന്ധങ്ങളിലേക്ക് സൂചന നല്‍കുന്നത്. കറന്‍സിക്ക് പകരം സ്വര്‍ണം ഉപയോഗിക്കുന് അന്താരാഷ്ട്രഇടപാടാണ് ഇതിന് പിന്നിലെന്നാണ് ഇവര്‍ നല്‍കുന്ന സൂചന. ഇത്തരം സംഘങ്ങള്‍ക്ക് വേണ്ടിയാണോ കേരളത്തില്‍ നിന്ന് നിരോധിത നോട്ടുകള്‍ ശേഖരിച്ചത് എന്ന സംശയവും ഉയര്‍ന്നിട്ടുണ്ട്. ദുബൈ അടക്കം പല വിദേശ രാജ്യങ്ങളില്‍ നിന്ന് ഇന്ത്യ നോട്ടുകള്‍ സ്വീകരിച്ചിരുന്ന സമയത്താണ് കേരളത്തില്‍ ഇത്തരം സംഘങ്ങള്‍ പ്രവര്‍ത്തിച്ചിരുന്നത്. നോട്ടുകെട്ടുകള്‍ കമ്മീഷന്‍ വ്യവസ്ഥയില്‍ ഏറ്റുവാങ്ങുന്ന സംഘങ്ങള്‍ അന്ന് തൃശൂര്‍, മലപ്പുറം, കോഴിക്കോട് ജില്ലകളില്‍ മാത്രം കോടിക്കണക്കിന് രൂപ പല വീടുകളിലും സൂക്ഷിച്ചുവച്ചിരുന്നത്. ഒരു കോടി രൂപയുടെ പഴയ ആയിരം, 500 നോട്ടുകള്‍ക്ക് പകരമായി 20 മുതല്‍ 22 ലക്ഷം രൂപ വരെ ഉടമയ്ക്ക് കിട്ടും. എട്ടുലക്ഷം രൂപ വരെ ഇടനിലക്കാര്‍ക്കും. പക്ഷേ, ഈ അസാധു നോട്ടുകള്‍ കൊണ്ട് ഈ സംഘം എന്തു ചെയ്യുന്നുവെന്നത് ഈ കണ്ണിക്കും അറിയില്ല. ഇന്ത്യയില്‍ നിരോധിച്ച 500, 1000 രൂപ നോട്ടുകള്‍ കൊറിയറായി വിദേശത്തേക്കു കടത്തുന്നുണ്ടെന്ന് അടുത്തിടെ കസ്റ്റംസ് കണ്ടെത്തിയിരുന്നു. ഇത്തരത്തില്‍ വിദേശത്തെത്തുന്ന നോട്ടുകള്‍ വീണ്ടും നാട്ടിലെത്തിച്ച് മാറ്റാനുള്ള ശ്രമങ്ങള്‍ നടക്കുന്നതായി കസ്റ്റംസ് വിഭാഗത്തിനു സൂചന ലഭിച്ചതായാണ് വിവരം. കള്ളപ്പണക്കാരും മറ്റും ഇപ്പോഴും പൂഴ്ത്തിവെച്ചിരിക്കുന്ന പഴയ 500, 1000 രൂപ നോട്ടുകള്‍ വിലകൊടുത്ത് വാങ്ങുന്ന മാഫിയയാണ് സജീവമായിട്ടുള്ളത്. ഈ നോട്ടുകള്‍ വിദേശത്തേക്ക് കയറ്റി അയച്ച് പുത്തന്‍പണമാക്കിയോ സ്വര്‍ണമാക്കിയോ ഇന്ത്യയിലേക്ക് തന്നെ തിരിച്ചെത്തുന്നതായാണ് സൂചനകളുള്ളത്. ഇതു സംബന്ധിച്ച് വ്യക്തമായ ധാരണ പോലീസിനോ എന്‍ഫോഴ്സ്മെന്റിനോ ലഭിച്ചിട്ടില്ലെങ്കിലും വിദേശത്തേക്ക് പഴയ ഇന്ത്യന്‍ കറന്‍സികള്‍ എന്തിനു കടത്തുന്നുവെന്നതിനെക്കുറിച്ച് അന്വേഷണം തുടങ്ങിയിരുന്നു അതിലേക്ക് കൂടിയാണ്പ ഉതിയ അന്വേഷണം എത്തുന്നത്.