എസ്എന്‍ഡിപിയില്‍ തമ്മിലടി രൂക്ഷം , കൂടുതല്‍ കള്ളങ്ങള്‍ പുറത്തേക്ക്

തമ്മിലടി രൂക്ഷമായതോടെ എസ് എന്‍ ഡി പി നേതാക്കളുടെ കൂടുതല്‍ സാമ്പത്തിക ഇടപാടുകള്‍ പുറത്തുവരുന്നു. മൈക്രോ ഫിനാന്‍സ് ഇടപടപാടും, എസ് എന്‍ ട്രെസ്റ്റ് തട്ടിപ്പിനും പുറമെ ഹവാല ഇടപാടുകള്‍ വരെയാണ് ഇപ്പോള്‍ പുറത്തുവരുന്നത്. തുഷാര്‍ വെള്ളാപ്പള്ളിക്ക് ഹവാല, തീവ്രവാദ ബന്ധമെന്ന് എന്‍ഡിഎ മുന്‍ ദേശീയ സെക്രട്ടറിയും ബിഡിജെഎസ് കണ്‍വീനറുമായിരുന്ന സുഭാഷ് വാസു. തുഷാറിന് വിദേശത്തും സ്വദേശത്തുമുള്ള കോടികളുടെ നിക്ഷേപത്തെക്കുറിച്ച് എന്‍ഐഎയോ സിബിഐയോ അന്വേഷിക്കണമെന്ന്് സുഭാഷ് വാസു മാധ്യമങ്ങളോട് പറഞ്ഞു. ഹവാലപ്പണം വിദേശത്തേക്ക് പോയിട്ടുണ്ടോ എന്നറിയാന്‍ 20 വര്‍ഷത്തെ സ്വദേശ, വിദേശ അക്കൗണ്ടുകള്‍ പരിശോധിക്കണം. തീവ്രവാദ ബന്ധമുണ്ടെന്ന് സംശയിക്കുന്ന ഇറാന്‍ സ്വദേശനിയുടെ ബംഗളൂരുവിലെ താമസം, മടങ്ങിപ്പോക്ക് എന്നിവ അന്വേഷിക്കണം. തെരഞ്ഞടുപ്പ് കമീഷനില്‍ നല്‍കിയ എസ്എസ്എല്‍സി ബുക്കിലെ വിവരങ്ങള്‍, ചേര്‍ത്തലയിലെ ഹോട്ടലിന്റെ ആസ്തി എന്നിവ സംബന്ധിച്ച് അന്വേഷിക്കണമെന്ന് ആവശ്യപ്പെട്ട് പരാതി നല്‍കുമെന്നും സുഭാഷ് വാസു പറഞ്ഞു. ഇതിനിടെ സുഭാഷ് വാസു കേന്ദ്രസര്‍ക്കാരിന്റെ സ്പൈസസ് ബോര്‍ഡ് ചെയര്‍മാന്‍ എന്ന നിലയില്‍ തുടരുന്നതിനെതിരെ ബി ജെ പി യിലും പ്രതിഷേധം. ഗവണ്‍മെന്റ് ഓഫ് ഇന്ത്യ എന്ന് ബോര്‍ഡുള്ള കാറാണ് സുഭാഷ് വാസു ഉപയോഗിക്കുന്നത്. ജാമ്യവ്യവസ്ഥയുടെ ഭാഗമായി ശനിയാഴ്ച ആലപ്പുഴ ക്രൈംബ്രാഞ്ച് ഓഫീസില്‍ എത്തിയതും ഇതേകാറില്‍. കോവിഡ് --19 ലോക്ഡൗണ്‍ ഘട്ടത്തില്‍ തടസ്സങ്ങളില്ലാതെ സഞ്ചരിക്കാനും ഈ കാര്‍ ഉപയോഗിച്ചിരുന്നു. കേസ് അന്വേഷിക്കുന്ന ക്രൈംബ്രാഞ്ച് ചൊവ്വാഴ്ച ഏഴ് മണിക്കൂര്‍ ചോദ്യംചെയ്തശേഷം പ്രാഥമികമായി തെളിവ് ലഭിച്ചതിനാല്‍ അറസ്റ്റ് ചെയ്യുകയായിരുന്നു. മുന്‍കൂര്‍ ജാമ്യത്തിനായി ഹൈക്കോടതി അഭിഭാഷകരെ കാണാനും സംസ്ഥാനം വിട്ടുള്ള യാത്രകള്‍ക്കും ഈ കാറാണ് ഉപയോഗിച്ചിരുന്നത്. അഴിമതിക്കേസില്‍ അറസ്റ്റിലായിട്ടും ബോര്‍ഡിന്റെ ചെയര്‍മാന്‍ സ്ഥാനത്തുനിന്ന് ഇയാളെ നീക്കാന്‍ ബിജെപി നേതൃത്വം തയ്യാറായിട്ടില്ല. എസ്എന്‍ഡിപി യ ഭാരവാഹികളെന്ന നിലയില്‍ തുഷാര്‍വെള്ളാപ്പള്ളിയും സുഭാഷ് വാസുവും മുന്‍കൈയെടുത്താണ് ബിഡിജെഎസ് രൂപീകരിച്ചതും എന്‍ഡിഎ മുന്നണിയില്‍ ചേര്‍ന്നതും. ഇതിന്റെ പ്രത്യുപകാരമായാണ് ബോര്‍ഡ് ചെയര്‍മാന്‍ സ്ഥാനം സുഭാഷിന് ലഭിച്ചത്.