നിലപാട്‌ മയപ്പെടുത്തി കോൺഗ്രസ്‌

രാജസ്ഥാനില്‍ സച്ചിൻ പൈലറ്റിന്റെ നേതൃത്വത്തിലുള്ള വിമത എംഎൽഎമാരുമായി പ്രശ്നപരിഹാരത്തിന് ചര്‍ച്ചയാകാമെന്ന് കോണ്‍​ഗ്രസ് ദേശീയനേതൃത്വം. ബിജെപിയുടെ  സുരക്ഷ ഉപേക്ഷിച്ച്‌ എംഎൽഎമാർ രാജസ്ഥാനിലേക്ക്‌ മടങ്ങിവന്നാൽമാത്രമേ  ചർച്ചയ്‌ക്ക്‌ വഴിയൊരുങ്ങു–- കോൺഗ്രസ്‌ വക്താവ്‌ രൺദീപ്‌ സുർജെവാല ട്വിറ്ററില്‍ കുറിച്ചു. ബിജെപി ഭരിക്കുന്ന ഹരിയാനയിലെ റിസോര്‍ട്ടിലാണ് വിമത എംഎല്‍എമാര്‍. ഈ മാസം 14ന് നിയമസഭ ചേരാനിരിക്കെ രാജസ്ഥാന്‍ സര്‍ക്കാരിനെ നിലനിര്‍ത്താന്‍ വിമതരെ അനുനയിപ്പിക്കാനുള്ള അവസാനശ്രമത്തിലാണ് കോണ്‍​ഗ്രസ്. സച്ചിൻപൈലറ്റ്‌ പക്ഷത്തെ കടന്നാക്രമിച്ചിരുന്ന മുഖ്യമന്ത്രി അശോക്‌ ഗെലോട്ടും കഴിഞ്ഞദിവസം നിലപാട്‌ മയപ്പെടുത്തി. ഹൈക്കമാൻഡ്‌ ക്ഷമിച്ചാൽ വിമത എംഎൽഎമാരെ സ്വീകരിക്കാമെന്നായിരുന്നു പ്രതികരണം. ഇതിന്റെ തുടർച്ചയാണ് സുർജെവാലയുടെ ട്വിറ്റര്‍ പ്രതികരണം. സച്ചിൻ പൈലറ്റും 18 എംഎൽഎമാരും നിയമസഭാസമ്മേളനത്തില്‍ പങ്കെടുക്കുന്ന കാര്യത്തിൽ അനിശ്ചിതത്വം തുടരുന്നു.