ഞങ്ങള്‍ വന്നത് കേരള സര്‍ക്കാര്‍ പറഞ്ഞിട്ട്

  സ്വര്‍ണക്കടത്ത് കേസിന്റെ സമഗ്രാന്വേഷണത്തിന് ഗൗരവപൂര്‍വം ഇടപെട്ട സംസ്ഥാന സര്‍ക്കാരിന് എന്‍ഐഎയുടെ അഭിനന്ദനം. കേസിലെ രണ്ടാംപ്രതി സ്വപ്ന സുരേഷിന്റെ ജാമ്യഹര്‍ജി പരിഗണിക്കവെ എന്‍ഐഎക്കുവേണ്ടി ഹാജരായ അഡീഷണല്‍ സോളിസിറ്റര്‍ ജനറല്‍ പി വിജയകുമാറാണ് സര്‍ക്കാരിന്റെയും മുഖ്യമന്ത്രിയുടെയും നടപടികളെ അനുമോദിച്ചത്. നയതന്ത്ര ബാഗേജില്‍ സ്വര്‍ണം കടത്തിയ കേസില്‍ ശക്തമായ അന്വേഷണം ആവശ്യപ്പെട്ട് മുഖ്യമന്ത്രി പിണറായി വിജയന്‍ പ്രധാനമന്ത്രിക്ക് അയച്ച കത്ത് അഭിഭാഷകന്‍ കോടതിയില്‍ വായിച്ചു. സ്വപ്നയെ കേസില്‍ കുരുക്കിയത് രാഷ്ട്രീയ ലക്ഷ്യത്തോടെയാണെന്ന സ്വപ്നയുടെ അഭിഭാഷകന്റെ വാദത്തിന് മറുപടിയായാണ് അഡീഷണല്‍ സോളിസിറ്റര്‍ ജനറലിന്റെ പരാമര്‍ശം. കേസില്‍ രാഷ്ട്രീയ ഇടപെടലില്ല. സംസ്ഥാന സര്‍ക്കാരാണ് ശക്തമായ അന്വേഷണം ആവശ്യപ്പെട്ടത്. തുടര്‍ന്നാണ് ദേശീയ അന്വേഷണ ഏജന്‍സിയും എന്‍ഫോഴ്സ്മെന്റ് ഡയറക്ടറേറ്റും കസ്റ്റംസുമെല്ലാം അന്വേഷണമാരംഭിച്ചത്. സര്‍ക്കാരിലെ ഉയര്‍ന്ന ഉദ്യോഗസ്ഥനെതിരെ ആക്ഷേപമുയര്‍ന്നപ്പോള്‍ത്തന്നെ അദ്ദേഹത്തെ സ്ഥാനത്തുനിന്ന് നീക്കി. സംസ്ഥാന സര്‍ക്കാരിന് ഇക്കാര്യത്തിലുള്ള സമീപനം അതില്‍നിന്ന് വ്യക്തമാണെന്നും രാഷ്ട്രീയ ഇടപെടലുണ്ടായാല്‍ ചുണ്ടിക്കാണിക്കുമായിരുന്നെന്നും അഡീഷണല്‍ സോളിസിറ്റര്‍ ജനറല്‍ കോടതിയെ അറിയിച്ചു.