സ്വപ്‌നയക്ക് വേണ്ടി കസ്റ്റംസും, ചാനല്‍ തലവനും

നയതന്ത്ര പാഴ്‌സലില്‍നിന്ന് 30 കിലോഗ്രാം സ്വര്‍ണം പിടികൂടിയ കേസില്‍, കള്ളക്കടത്തു സംഘത്തിനുകൂലമായി കസ്റ്റംസിലെ ഒരുദ്യോഗസ്ഥന്‍ ഇടപെട്ടതായി സ്വപ്നയുടെ മൊഴി. ആരോപണവിധേയനായ അസി. കമ്മിഷണറെ അന്വേഷണ സംഘം ചോദ്യം ചെയ്യും. നയതന്ത്ര പാഴ്‌സല്‍ തടഞ്ഞുവച്ച കാര്‍ഗോ കോംപ്ലക്‌സ് അസിസ്റ്റന്റ് കമ്മിഷണറായ ഉദ്യോഗസ്ഥനെതിരെ പരാതി നല്‍കാന്‍ കസ്റ്റംസ് ആന്‍ഡ് ജിഎസ്ടി ചീഫ് കമ്മിഷണറേറ്റിലെ മറ്റൊരു അസിസ്റ്റന്റ് കമ്മിഷണര്‍ നിര്‍ദേശിച്ചതായാണു കസ്റ്റംസിനു നല്‍കിയ മൊഴിയിലുള്ളത്. ജൂലൈ രണ്ടിന്, തന്റെ വീട്ടിലുള്ളപ്പോഴാണു സരിത്തിനെ കസ്റ്റംസ് ഉദ്യോഗസ്ഥന്‍ വിളിച്ചതെന്നു സ്വപ്നയുടെ മൊഴിയില്‍ പറയുന്നു. 'അനാവശ്യ പ്രശ്‌നങ്ങളുണ്ടാക്കാനാണു നയതന്ത്ര ബാഗേജ് തടഞ്ഞുവച്ചതെന്നാണു ജൂലൈ 2 ന് സരിത്തിനെ വിളിച്ച ഉദ്യോഗസ്ഥന്‍ പറഞ്ഞത്. അദ്ദേഹം വീണ്ടും സരിത്തിനെ വിളിച്ചാണു വകുപ്പിലെ മേലധികാരിക്കു പരാതി നല്‍കണമെന്നു പറഞ്ഞതും അതിനായി ഫോണ്‍ നമ്പറും ഇ മെയില്‍ ഐഡിയും നല്‍കിയതും. സരിത്താണ് ഇക്കാര്യങ്ങള്‍ എന്നോടു പറഞ്ഞത്.' - സ്വപ്നയുടെ മൊഴിയില്‍ പറയുന്നു എന്നാണ് പുറത്തുവന്നിരിക്കുന്ന റിപ്പോര്‍ട്ട് . നയതന്ത്ര പാഴ്‌സല്‍ വഴിയുള്ള സ്വര്‍ണക്കടത്തെന്ന ആശയത്തിനു പിറകില്‍ ആരാണെന്ന സംശയത്തിന്റെ ഭാഗമായാണ് അന്വേഷണ സംഘം പ്രതികള്‍ക്ക് ഉദ്യോഗസ്ഥരുമായുള്ള ബന്ധം അന്വേഷിച്ചത്. അതിനാല്‍ ഇതിലേക്ക് കൂടുതല്‍ പരിശോധനകള്‍ വന്നേക്കും. അതുമാത്രമല്ല സംഘപരിവാറിന് പിന്‍തുണ നല്‍കുന്ന മലയാളം ചാനലിന്റെ ചുമതലക്കാരനെക്കുറിച്ചും സ്വപ്‌നയുടെ മൊഴിയില്‍ പരാമര്‍ശങ്ങളുണ്ടെന്ന് വിവരങ്ങള്‍ പുറത്തുവന്നു കഴിഞ്ഞു. സ്വര്‍ണക്കടത്ത് കേസ് രജിസ്റ്റര്‍ചെയ്ത ദിവസം പ്രതി സ്വപ്ന സുരേഷിനെ ചാനല്‍ എഡിറ്റര്‍ വിളിച്ചത് എന്തിന് വേണ്ടി എന്ന സംശയം ബലപ്പെടുന്നു. പിടിച്ചത് നയതന്ത്ര ബാഗേജ് അല്ലെന്ന് യുഎഇ കോണ്‍സുലേറ്റ് ഉദ്യോഗസ്ഥനെക്കൊണ്ട് പറയിച്ചാല്‍ പ്രശ്‌നം തീരുമെന്ന് എഡിറ്റര്‍ ഉപദേശിച്ചതായി സ്വപ്ന മൊഴി നല്‍കിയിട്ടുണ്ട്. 2018ല്‍ തിരുവനന്തപുരത്തെ ഒരു ഹോട്ടലില്‍വച്ച് എഡിറ്റര്‍ കണ്ടകാര്യവും സ്വപ്നയുടെ മൊഴിയിലുണ്ട്.