ഫയല്‍ ചോര്‍ത്തി രാഷ്ട്രീയം കളിച്ചാല്‍ ഇനി കുടുങ്ങും

രാഷ്ട്രീയ നേട്ടത്തിനായി കൂട്ടുനിന്ന് സര്‍ക്കാര്‍ പദ്ധതികളെ വിവാദത്തിലാക്കിയാല്‍ ഇനി കുടുങ്ങുക ചുമതലയുള്ള ഉദ്യോഗസ്ഥര്‍. സര്‍ക്കാര്‍ മുന്നോട്ടു കൊണ്ടുവരുന്ന പദ്ധതികളെ വിവിധ വ്യാഖ്യാനങ്ങള്‍ ചമച്ച് പിന്നോട്ട് കൊണ്ടുപോകാനുള്ള നടപടിപടിക്കെതിരെയാണ് കര്‍ശന തീരുമാനം വന്നിരിക്കുന്നത്. ഇതോടെ പല ചാനലുകളുടെയും പ്രിയപ്പെട്ടവരായ ഉന്നതര്‍ വിഷമത്തിലാവും. സര്‍ക്കാര്‍ ഫയലിലെ കുറിപ്പുകളും ഉത്തരവുകളും മറ്റും മാധ്യമങ്ങള്‍ക്കു ചോര്‍ത്തി നല്‍കുന്നുവെന്നു വകുപ്പു മേധാവികളുടെ യോഗത്തില്‍ മുഖ്യമന്ത്രി തന്നെ വിമര്‍ശനം ഉന്നയിച്ചിരുന്നു. തുടര്‍ന്നാണ് ചീഫ് സെക്രട്ടറി വിശ്വാസ് മേത്ത അവര്‍ക്കു മുന്നറിയിപ്പു കത്ത് നല്‍കിയത്. രഹസ്യവിവരങ്ങള്‍ ചോരുന്നുവെന്ന പരാതി ഭരണകര്‍ത്താക്കള്‍ ഉദ്യോഗസ്ഥരുടെ യോഗത്തില്‍ ഉന്നയിക്കാറുണ്ടെങ്കിലും വിവരങ്ങള്‍ കൈമാറിയാല്‍ നടപടിയെടുക്കുമെന്ന ഉത്തരവ് വന്നതോടെ തങ്ങളുടെ രാഷ്ട്രീയം മാറ്റിവയ്ക്കാന്‍ ഉദ്യോഗസ്ഥര്‍ നിര്‍ബന്ധിതരാവും. വിവരാവകാശ നിയമത്തിലൂടെ കാര്യങ്ങള്‍ വേണ്ടവര്‍ അപേക്ഷിക്കട്ടെ അതിന് വ്യവസ്ഥാപിത രീതിയുണ്ടെന്നാണ് സര്‍ക്കാര്‍ വ്യക്തമാക്കുന്നത്. വകുപ്പുകളില്‍ ഫയലുകള്‍ കൈകാര്യം ചെയ്യുന്നതു സെക്ഷന്‍ ഓഫിസര്‍ ഉള്‍പ്പെടെ ഉദ്യോഗസ്ഥരാണ്. ഇ-ഫയലുകളാണ്. ഉദ്യോഗസ്ഥര്‍ ആരെങ്കിലും ഫയലിന്റെ പകര്‍പ്പെടുത്തു പുറത്തുവിട്ടാല്‍ വകുപ്പു മേധാവികള്‍ ഉത്തരവാദികളാകും എന്നതിനാല്‍ സംവിധാനം മുഴുവന്‍ കാര്യക്ഷമമാവും. ധന, ആഭ്യന്തര വകുപ്പുകളിലും ചീഫ് സെക്രട്ടറി, ഡിജിപി ഓഫിസുകളിലും മാത്രമേ രഹസ്യസ്വഭാവമുള്ള ഫയലുകള്‍ കൈകാര്യം ചെയ്യാന്‍ സീക്രട്ട് സെക്ഷനുകള്‍ ഉള്ളൂ. മറ്റു വകുപ്പുകളില്‍ സുതാര്യമായാണു ഫയലുകള്‍ കൈകാര്യം ചെയ്യുന്നത്. വിവരാവകാശ നിയമം സെക്ഷന്‍ 4 പ്രകാരം ഈ വിവരങ്ങളെല്ലാം ജനങ്ങള്‍ക്കു ലഭ്യമാക്കേണ്ടവയാണ്. അത് ലഭിക്കേണ്ടവര്‍ അപേക്ഷ നല്‍കി അത് വാങ്ങട്ടെ സര്‍ക്കാര്‍ ഉദ്യോഗസ്ഥര്‍ രഹസ്യമായി അതു ചെയ്യണ്ട .