കേരളത്തില്‍ സ്വകാര്യ ആശുപത്രികളിൽ കോവിഡ് ചികിത്സ തുടങ്ങി

സംസ്ഥാനത്തെ ഒട്ടേറെ സ്വകാര്യ ആശുപത്രികളിൽ കോവിഡ് ചികിത്സ ആരംഭിച്ചു. പൊതുമേഖല, സ്വകാര്യ കമ്പനികളുടെ ആരോഗ്യ ഇൻഷുറൻസ് ഉള്ളവർക്ക് അതിന്റെ പരിരക്ഷയും ലഭിക്കും. നേരത്തെ സർക്കാർ ആശുപത്രികളിൽ മാത്രമായിരുന്നു കോവിഡ് ചികിത്സ. അതിനാൽ സ്വകാര്യ ആശുപത്രിയിൽ ചികിത്സിക്കുന്നവർക്ക് ഇൻഷുറൻസ് പരിരക്ഷ നൽകാനാവില്ലെന്ന നിലപാടിലായിരുന്നു കമ്പനികൾ. സ്വകാര്യ ആശുപത്രികളിൽ ചികിത്സിക്കാമെന്നു സർക്കാർ ഉത്തരവു പുറപ്പെടുവിച്ചതോടെ ആ തടസ്സവും നീങ്ങി. കോവിഡ് ലക്ഷണങ്ങളുമായി സ്വകാര്യ ആശുപത്രികളിൽ എത്തുന്നവരുടെ സാംപിൾ അതത് ആശുപത്രികളിലെ ലാബിലോ പുറത്തെ അംഗീകൃത ലാബിലോ പരിശോധിക്കാം. പോസിറ്റീവ് ആണെങ്കിൽ സ്വകാര്യ ആശുപത്രിയിൽ ചികിത്സ തുടരാം. കോവിഡ് ചികിത്സ നടത്തുന്ന സ്വകാര്യ ആശുപത്രികൾക്കു സർക്കാർ പ്രത്യേക മാനദണ്ഡങ്ങൾ നിശ്ചയിച്ചിട്ടുണ്ട്. കുറഞ്ഞത് 20 കിടക്കകൾ നീക്കിവയ്ക്കണമെന്നും പ്രത്യേക പ്രവേശന കവാടം വേണമെന്നുമാണു പ്രധാന നിബന്ധന. പിസിആർ പരിശോധനയ്ക്കു 2750 രൂപയും ട്രൂനാറ്റ് പരിശോധനയ്ക്ക് 1500 രൂപയും ആന്റിജൻ പരിശോധനയ്ക്ക് 625 രൂപയുമായിരിക്കണം നിരക്ക്. മറ്റു ചികിത്സാച്ചെലവുകൾ സ്വകാര്യ ആശുപത്രികൾക്കു നിശ്ചയിക്കാം. കോവിഡ് ബാധിതരിൽ, കാരുണ്യ ആരോഗ്യ സുരക്ഷാ പദ്ധതിയിൽ (കാസ്പ്) അംഗങ്ങളായവരുടെയും സർക്കാർ ആശുപത്രികളിൽ നിന്നു സ്വകാര്യ ആശുപത്രികളിലേക്കു റഫർ ചെയ്യുന്നവരുടെയും ചികിത്സാച്ചെലവു സർക്കാരാണു നൽകുന്നത്. ഈ വിഭാഗത്തിൽ 80 സ്വകാര്യ ആശുപത്രികളെയാണ് ഇതുവരെ എംപാനൽ ചെയ്തത്. ഇതിൽ 30 ആശുപത്രികളിൽ ചികിത്സ ആരംഭിച്ചു.