കോവിഡ് വീട്ടുചികിത്സ എങ്ങനെ

സമ്പര്‍ക്കത്തിലൂടെ കോവിഡ് രോഗികളായി സംശയിക്കപ്പെട്ട് കോവിഡ് പ്രഥമതല ചികിത്സാകേന്ദ്രങ്ങളില്‍ ഉള്ളവര്‍ക്ക് രോഗലക്ഷണം ഇല്ലെങ്കില്‍ വീട്ടുനിരീക്ഷണമാകാമെന്ന് ആരോഗ്യവകുപ്പ്. രോഗവ്യാപന തോത് അനുസരിച്ച് ജില്ലകള്‍ക്ക് തീരുമാനമെടുക്കാം. ഇതുവഴി പ്രഥമതല ചികിത്സാകേന്ദ്രങ്ങളിലെ ലക്ഷണമുള്ള രോഗികള്‍ക്ക് കൂടുതല്‍ ശ്രദ്ധ നല്‍കാനാകുമെന്നും ആരോഗ്യവകുപ്പ് പുറത്തിറക്കിയ മാര്‍ഗനിര്‍ദേശത്തില്‍ പറയുന്നു. ടെലി മെഡിസിന്‍, കോവിഡ് കോള്‍ സെന്റര്‍, ആവശ്യമെങ്കില്‍ രോഗികളെ ആശുപത്രികളിലേക്ക് മാറ്റാനുള്ള വികേന്ദ്രീകൃത ഗതാഗതാ സംവിധാനം എന്നിവ പൂര്‍ണസജ്ജമാണെന്ന് ഉറപ്പാക്കണം.പന്ത്രണ്ട് വയസ്സില്‍ താഴെയുള്ളവര്‍ക്കൊപ്പം രക്ഷിതാവിനോ മറ്റൊരു കുടുംബാംഗത്തിനോ സമ്പര്‍ക്കവിലക്കില്‍ കഴിയാം. മൂന്നാമതൊരു അംഗം ഇവരെ പരിചരിക്കണം. വീട്ടിലെ മുതിര്‍ന്ന പൗരന്മാര്‍ രോഗിയുമായോ രോഗി ഉപയോഗിച്ച വസ്തുക്കളുമായോ സമ്പര്‍ക്കത്തില്‍ വരരുത്. ഹൈ റിസ്‌ക് വിഭാഗത്തിലെ അംഗങ്ങളെ കഴിയുമെങ്കില്‍ മാറ്റിപ്പാര്‍പ്പിക്കണം. ദിവസേന പള്‍സ് ഓക്‌സിമീറ്റര്‍ ഉപയോഗിച്ച് ശരീരത്തിലെ ഓക്‌സിജന്‍ അളവ് നിര്‍ണയിക്കണം. രുചിയില്ലായ്മ, ശ്വാസതടസ്സം, നെഞ്ചുവേദന, ബോധക്ഷയം, അമിതക്ഷീണം തുടങ്ങിയ പ്രശ്നങ്ങള്‍ (റെഡ് ഫ്‌ലാഗ് സൈന്‍സ്) അനുഭവപ്പെട്ടാല്‍ ഉടന്‍ മെഡിക്കല്‍ ഓഫീസറെ അറിയിക്കണം. രോഗിയും പരിചാരകനും സദാസമയവും ത്രീ ലെയര്‍ മാസ്‌ക് ഉപയോഗിക്കണം. ടെലി കണ്‍സള്‍ട്ടേഷനുമായി സഹകരിക്കണം. ലക്ഷണങ്ങള്‍ പ്രകടമായാല്‍ അവയുടെ തീവ്രതയുടെ അടിസ്ഥാനത്തില്‍ എത്രയുംപെട്ടെന്ന് പ്രഥമതല ചികിത്സാ കേന്ദ്രങ്ങളിലേക്കോ കോവിഡ് ആശുപത്രികളിലേക്കോ മാറ്റണം