കൃഷ്ണപിള്ളയുടെ ജന്മഗൃഹം ഇനി ചരിത്രസ്മാരകം

ക്ഷേത്ര നഗരിയിലെ ചുവന്ന മണ്ണ് ഇനി സിപിഐക്കു സ്വന്തം. കമ്യൂണിസ്റ്റ് പാർട്ടി സ്ഥാപക നേതാവ് പി. കൃഷ്ണപിള്ള ജനിച്ചു വളർന്ന പറൂർ വീടിരുന്ന 16.5 സെന്റ് സ്ഥലം കുടുംബാംഗങ്ങളിൽ നിന്നു സിപിഐ വിലയ്ക്കു വാങ്ങി. ഇന്ന് പി. കൃഷ്ണപിള്ള ദിനം ഇവിടെ പതാക ഉയർത്തി ആചരിക്കും. കേരളത്തിലെ കമ്യൂണിസ്റ്റ് പാർട്ടിയുടെ ചരിത്രം വിളംബരം ചെയ്യുന്ന സ്മാരകം, ലൈബ്രറി, മ്യൂസിയം എന്നിവ ഇവിടെ സ്ഥാപിക്കുമെന്നു സിപിഐ സംസ്ഥാന സെക്രട്ടറി കാനം രാജേന്ദ്രൻ പറഞ്ഞു. സംസ്ഥാന സെക്രട്ടറി എന്ന നിലയിൽ കാനം രാജേന്ദ്രന്റെ പേരിൽ ഇന്നലെ ഭൂമിയുടെ പോക്കു വരവ് നടത്തി.കൃഷ്ണപിള്ള പാമ്പു കടിയേറ്റു മരിച്ച ആലപ്പുഴ മുഹമ്മയ്ക്കടുത്ത് കണ്ണാർക്കാട്ട് വീട് സിപിഎം വാങ്ങി സ്മാരകമാക്കിയിരുന്നു. ഇവിടെ സംയുക്തമായാണ് ഇരുപാർട്ടികളും അനുസ്മരണ സമ്മേളനം നടത്തിയിരുന്നത്. 6 മാസം മുൻപ് കുടുംബാംഗങ്ങൾ വൈക്കത്തെ സ്ഥലം വിൽക്കുന്നുവെന്നറിഞ്ഞ് സിപിഐ നേതാക്കൾ സമീപിച്ചു. നഗരസഭയിലെ ആയുർവേദ ആശുപത്രിക്കു സമീപത്താണ് ഈ ഭൂമി. വീട് ഇപ്പോഴില്ല. തറയും പറമ്പുമുള്ള സ്ഥലം ഇന്നലെ പാർട്ടി പ്രവർത്തകർ വൃത്തിയാക്കി. 1906 ൽ വൈക്കത്ത് മണപ്പള്ളി നാരായണൻ നായരുടെയും പറൂർ വീട്ടിൽ പാർവതിയുടെയും മകനായാണ് കൃഷ്ണപിള്ളയുടെ ജനനം. പഠനത്തിനു ശേഷം ആലപ്പുഴയിൽ കയർ തൊഴിലാളിയായ കൃഷ്ണപിള്ള കണ്ണാർക്കാട്ട് വീട്ടിൽ വച്ചാണ് 1948 ഓഗസ്റ്റ് 19നു പാമ്പു കടിയേറ്റു മരിച്ചത്.1927-ലാണ് പറൂർ കുടുംബം ഭാഗം വയ്‌ക്കുന്നത്, കൃഷ്ണപിള്ളയുടെ ഇരുപത്തിയൊന്നാം വയസ്സിൽ. തറവാട് ഭാഗം വയ്‌ക്കുന്നതിനെ ആദ്യം കൃഷ്ണപിള്ള എതിർത്തു. ഒടുവിൽ അതിന് സമ്മതിച്ചു. ഭാഗിക്കാൻ ഉണ്ടായിരുന്നത് പുരയിടവും പറമ്പുമാണ്. ഒന്നിച്ചത് തീറ് കൊടുത്തു. സെന്റിന് പതിനഞ്ച് രൂപവച്ചാണ് വിറ്റത്. കിട്ടിയത് രണ്ടായിരം രൂപ. ഇത് മൂന്നാൾക്കായി പങ്കുവച്ചു. ആ സ്ഥലമാണ് കെ എസ് സുനീഷ്, കെ എസ് കണ്ണൻ, നന്ദിനി സോമൻ എന്നിവരിൽനിന്ന് സിപിഐ വിലയ്ക്ക് വാങ്ങിയത്‌.കേരളത്തിലെ കമ്യൂണിസ്റ്റ് പാർടിയുടെ ചരിത്രം അനാവരണം ചെയ്യുന്ന സ്മാരകം ഇവിടെ ഉയർത്താനാണ് ആലോചിക്കുന്നത്. വിശാലമായ റഫറൻസ് ലൈബ്രറിയും സ്ഥാപിക്കും..