കൊവിഡ് വാകസിന്‍ ഉടന്‍ കിട്ടുമോ

രീക്ഷണങ്ങൾ തീരും മുൻപേ വാക്സീൻ ഉപയോഗത്തിനു നൽകുന്നതു സംബന്ധിച്ചു തീരുമാനമെടുത്തിട്ടില്ലെന്ന് ആരോഗ്യമന്ത്രാലയത്തിലെ ഉന്നത ഉദ്യോഗസ്ഥൻ  അറിയിച്ചു . . മൂന്നാംഘട്ട പരീക്ഷണത്തിലേക്കു കടക്കും മുൻപേ തദ്ദേശീയ സാധ്യതാ വാക്സീനുകൾ അടിയന്തര ഉപയോഗം (എമർജൻസി യൂസ്) എന്ന നിലയിൽ പ്രയോഗിച്ചേക്കുമെന്നു റിപ്പോർട്ടുകൾ പുറത്തു വന്നിരുന്നു. വാക്സീൻ ഗവേഷണവുമായി ബന്ധപ്പെട്ട സ്ഥിതി അവതരിപ്പിച്ചു പാർലമെന്ററി സമിതിക്കു മുന്നിൽ ഇന്ത്യൻ കൗൺസിൽ ഓഫ് മെഡിക്കൽ റിസർച്ചാണ് ഇക്കാര്യം പറഞ്ഞതെന്നായിരുന്നു റിപ്പോർട്ടുകൾ. എന്നാൽ, നിലവിൽ കോവിഡ് ചികിത്സയിൽ മരുന്നുകൾ നൽകുന്നതു പോലെ അടിയന്തര ഉപയോഗം എന്ന സാധ്യത കൂടിയുണ്ടെന്നു മാത്രമാണ് ഐസിഎംആർ അറിയിച്ചതെന്ന് ആരോഗ്യമന്ത്രാലയം വ്യക്തമാക്കി. ഇതുസംബന്ധിച്ച് തീരുമാനമെടുത്തിട്ടില്ല. അതിനു സാധ്യതാ വാക്സീന്റെ സുരക്ഷിതത്വവും ഫലപ്രാപ്തിയും അടക്കം കാര്യങ്ങളിൽ കൂടുതൽ വ്യക്തത വേണം. നിലവിൽ രണ്ട് തദ്ദേശീയ വാക്സീനുകളും ഒന്നാം ഘട്ട പരീക്ഷണം മാത്രമാണ് പൂർത്തിയാക്കിയത്. രണ്ടാം ഘട്ടത്തിലേക്കു കടക്കുന്നതേയുള്ളു. ഈ പരീക്ഷണഫലം കൂടി ലഭിച്ച ശേഷമായിരിക്കും തുടർനടപടികളെന്നും ആരോഗ്യമന്ത്രാലയത്തിലെ ഉന്നത ഉദ്യോഗസ്ഥൻ വ്യക്തമാക്കി. ഓക്സ്ഫഡ്–അസ്ട്രാസെനക്ക വാക്സീൻ ഇന്ത്യയിൽ നിർമിക്കുന്ന പുണെ സീറം ഇൻസ്റ്റിറ്റ്യൂട്ട് രണ്ടും മൂന്നും ഘട്ട പരീക്ഷണങ്ങൾ വൈകാതെ തുടങ്ങുമെന്ന് ഐസിഎംആർ വ്യക്തമാക്കി. ഓക്സ്ഫഡിന്റേതിനു പുറമേ, യുഎസ് കമ്പനിയായ നോവവാക്സിന്റെ പരീക്ഷണവും സീറം ഇൻസ്റ്റിറ്റ്യൂട്ട് നിർവഹിക്കും. തദ്ദേശീയ വാക്സീനുകളുടെ ഗവേഷണത്തിലടക്കം നേരിട്ടു പിന്തുണ നൽകുന്നുണ്ടെന്നും ഐസിഎംആർ അറിയിച്ചു.